စစ်ကိုင်းတိုင်း တမူးမြို့ မြို့မ ၁၂ ရပ်ကွက်ရှိ နန်းဖာလုံ အထက (ခွဲ) ကျောင်းမှာ တပ်စွဲထားတဲ့ စစ်ကောင်စီတပ်ကို တမူး PDF တပ်ရင်း ၁ နဲ့ ၂ ပူးပေါင်းတပ်ဖွဲ့က ဧပြီ ၁၇ ရက် ညအစောပိုင်းမှာ ဝင်ရောက်ပစ်ခတ်တိုက်ခိုက်ခဲ့တယ်လို့ သိရပါတယ်။
အဲဒီဖြစ်စဉ်မှာ စစ်ကောင်စီတပ်သား ၄ ဦး ကျဆုံးသွားပြီး ပူးပေါင်းတပ်ဖွဲ့ဘက်က အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ တမူး PDF က ထုတ်ပြန်ထားပါတယ်။
"တမူး PDF တပ်ရင်း-၁ နဲ့ တပ်ရင်း-၂ ပူးပေါင်းတပ်ဖွဲ့က အလစ်ငိုက်ဝင်ရောက်တိုက်ခိုက်ခဲ့တာ။ စစ်ကောင်စီဘက်က တပ်ကြပ်အဆင့် တစ်ကောင်ပါပြီး စစ်သား ၄ ကောင်က ကျောင်းရှေ့ လမ်းမပေါ်မှာ အတုံးအရုံးသေဆုံးသွားတယ်” လို့ တမူး PDF တပ်ရင်း ၁ တာဝန်ခံက ဒီဗွီဘီကို ပါတယ်။
တိုက်ပွဲဖြစ်စဉ်အပြီး နာရီဝက်အကြာမှာ တမူးမြို့ဘက်ကနေ လူနာတင်ကားနဲ့ စစ်ကောင်စီကားတွေ ရောက်လာကာ လက်နက်ကြီး၊ လက်နက်ငယ်တွေနဲ့ ရမ်းသမ်းပစ်ခတ်ခဲ့ကြပြီး သေဆုံးသွားတဲ့ စစ်ကောင်စီအလောင်းတွေကို တင်ဆောင်ကာ ည ၉ နာရီလောက် တမူးမြို့ထဲ ပြန်လည်ထွက်ခွာသွားကြတယ်လို့ ဒေသခံတွေဆီက ပြောပါတယ်။
နန်းဖာလုံ အထက (ခွဲ) ကျောင်းမှာ တပ်စွဲထားတဲ့ တပ်ဖွဲ့ဝင်တွေ တိုက်ခိုက်ခံရတာနဲ့ ပတ်သက်ပြီး စစ်ကောင်စီကတော့ သတင်းထုတ်ပြန်တာမရှိသေးပါဘူး။
တမူး-အောင်ဇေယျကားလမ်းပိုင်းကို လွန်ခဲ့တဲ့ရက်ပိုင်းကစလို့ တမူး PDF က ထိန်းချုပ်ထားပြီး ပြည်သူတွေ ခရီးသွားလာရာမှာ ကားအမိုးဖွင့်မောင်းဖို့နဲ့ စစ်ဆေးမေးမြန်းတာတွေကို လက်ခံလိုက်နာဖို့ မေတ္တာရပ်ခံထားပါတယ်။
ဧပြီ ၁၇ ရက်နေ့ခင်းပိုင်းကလည်း တမူးပြည်သူ့ရဲတပ်ဖွဲ့က တမူးမြို့ နန်းဖာလုံဈေးအတွင်းနဲ့ ကုန်တင်ယာဉ်တွေမှာ စစ်တပ်ပိုင်ထုတ်ကုန်ပစ္စည်းတွေ ဝယ်ယူရောင်းချတာ ရှိမရှိ စစ်ဆေးခဲ့ကြတယ်လို့ သိရပါတယ်။
