ကရင်အမျိုးသားအစည်းအရုံး (KNU)၊ တပ်မဟာ ၅ ထိန်းချုပ်နယ်မြေ၊ ဖာပွန်(မူတြော်)ခရိုင်၊ တောင်ပိုင်းနဲ့ မြောက်ပိုင်းနယ်မြေမှာ စစ်ကောင်စီရဲ့ တပ်စခန်း ၁၀ ခုကို KNLA တပ်ဖွဲ့ဝင်တွေက ၁၁ ကြိမ်ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၆ ဦးသေဆုံးခဲ့တယ်လို့ ဧပြီ ၉ ရက်မှာ KNU က သတင်းထုတ်ပြန်ပါတယ်။
ဧပြီ ၉ ရက် မနက်ပိုင်းက စစ်ကောင်စီရဲ့ ဖာပွန်အခြေစိုက် ခမရ ၄၃၄၊ စစ်ဆေးရေးဂိတ်ကို ၁ ကြိမ်နဲ့ လယ်မူပလောဒေသ(လွယ်မူပလော)၊ ထူးထာစခန်းကို ၂ ကြိမ် စုစုပေါင်း ၃ ကြိမ် ကရင်အမျိုးသားလွတ်မြောက်ရေးတပ်မတော်၊ လက်အောက်ခံ တပ်ရင်း၊ တပ်ခွဲ၊ တပ်ဖွဲ့ဝင်တွေက ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁ ဦးသေဆုံးပြီး ဒဏ်ရာရရှိမှုကို အတည်မပြုနိုင်သေးဘူးလို့ ဆိုပါတယ်။
အလားတူ ဧပြီ ၈ ရက် မနက်ပိုင်းကစတင်ပြီး ကူဒေးဒေသ(နားထီးနို)၊ စောမူပလောဒေသ(လောဖလပ်မယ်)၊ စီဒေးဒေသ(ပွယ်လော်ဆက်)၊ စောမူပလောဒေသ( နိုးခို)၊ ဖာပွန်အခြေစိုက် ခမရ ၄၃၄ တပ်စခန်း၊ လယ်ကလေးကုန်း၊ ကူဒေးဒေသ(ထီးပွယ်ခို)နဲ့ ယူဂေါ်လိုဒဲဒေသ(ဒူးထောကျိုး) ၁ ကြိမ်စီ၊ စုစုပေါင်း ၈ ကြိမ် ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဉီးသေဆုံးပြီး ဒဏ်ရာရရှိမှုကို မသိရသေးပါဘူး။
ဧပြီ ၈ ရက် ည ၇ နာရီခွဲလောက်က စစ်ကောင်စီတပ်တွေ လက်နက်ခဲယမ်းနဲ့ စားနပ်ရိက္ခာတွေ သယ်ဆောင်အသုံးပြုနေတဲ့ ဖာပွန်မြို့၊ မယ်တရိုးတံတားကို KNLA တပ်ဖွဲ့ဝင်တွေက ဝင်ရောက်ဖျက်ဆီးနိုင်ခဲ့တယ်လို့ KNU က ထုတ်ပြန်ထားပါ။
KNU ထိန်းချုပ်နယ်မြေအတွင်းက စစ်ကောင်စီရဲ့ ရှေ့တန်းတပ်စခန်းတွေအတွက် လက်နက်ခဲယမ်းနဲ့ စားရိက္ခာတွေ ဖြည့်တင်းပို့ဆောင်ဖို့ စစ်ကောင်စီက ပိုမိုလုပ်ဆောင်လာတဲ့အတွက် KNU၊ တပ်မဟာ ၅ လက်အောက်ခံ၊ KNLA- တွေနဲ့ တိုက်ပွဲတွေဖြစ်ပွားရာမှာ ယခင်လတွေထက် ပိုမိုဖြစ်ပွားလာတယ်လို့ KNU တာဝန်ရှိသူက ဆိုပါတယ်။
