ပဲခူးတိုင်း ညောင်လေးပင်မြို့နယ်မှာ မတ် ၃၀ ရက် မနက်ပိုင်းက စိုက်ပျိုးစရိတ်ချေးငွေ လာတောင်းတဲ့ စစ်ကောင်စီဝန်ထမ်းတွေ မိုင်းဆွဲတိုက်ခိုက်ခံရပြီး ရဲ ၁ ယောက်အပါအဝင် ၄ ယောက် သေဆုံးခဲ့တယ်လို့ ပဲခူးခရိုင် PDF ကနေ သိရပါတယ်။

ဒီနေ့မနက် ၆ နာရီကျော်လောက်မှာ စိုက်ပျိုးစရိတ်ချေးငွေ တောင်းဖို့လာတဲ့ စစ်ကောင်စီ ထွေအုပ်ဝန်ထမ်းတွေနဲ့ ရဲတွေကို မိုင်းဆွဲတိုက်ခိုက်ခဲ့တာဖြစ်ပြီး ရဲတပ်သားတယောက်၊ ညောင်လေးပင် ထွေအုပ်ဝန်ထမ်း ထူးစေး၊ ရာအိမ်မှူး ကုလား (ခ) တင်စိုးနဲ့ ပြည်တော်အေးပိုင်း ရာအိမ်မှူး နိုင်ဝင်းတို့ ၄ ယောက် သေဆုံးခဲ့တယ်လို့ ဆိုပါတယ်။

ဖောက်ခွဲတိုက်ခိုက်မှုကြောင့် စစ်ကောင်စီခန့် ပေါက်ကုန်းလေး အုပ်ချုပ်ရေးမှူးနဲ့ တခြားလူတချို့လည်း အပြင်းအထန် ဒဏ်ရာရရှိသွားတယ်လို့ ပြောပါတယ်။

ဒါ့အပြင် ညောင်လေးပင်မြို့နယ် တော်ဝိကျေးရွာ အုပ်ချုပ်ရေးမှူးရုံးကို ဒီကနေ့မနက် ၅ နာရီကျော်လောက်မှာ ပဲခူးခရိုင် PDF တပ်ရင်း ၁၊ တပ်ခွဲ ၁ Eagle Guerilla Force က ဖောက်ခွဲတိုက်ခိုက်ခဲ့တယ်လို့ ပဲခူးခရိုင် PDF ပြန်ကြားရေးတာဝန်ခံက ပြောပါတယ်။

ပဲခူးခရိုင် PDF အနေနဲ့ အာဏာသိမ်း စစ်ကောင်စီနဲ့ ထောက်တိုင်တွေကို အရှိန်ဟုန်မြှင့် တိုက်ခိုက်သွားမှာဖြစ်လို့ မိဘပြည်သူတွေအနေနဲ့ စစ်အုပ်စုနဲ့ နီးစပ်တဲ့နေရာတွေကို ရှောင်ရှားကြဖို့ သတိပေးထားပါတယ်။

အဲဒီ မိုင်းဆွဲတိုက်ခိုက်ခံရတဲ့ ဖြစ်စဉ်နဲ့ ပတ်သက်လို့ ထိခိုက်သေဆုံးတဲ့ အခြေနေကို စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။