စစ်ကိုင်းတိုင်း၊ မင်ကင်းမြို့နယ်၊ ​တောင်တွင်း​ဒေသမှာ မတ် ၂၆ ရက် မနက် ၇ နာရီလောက်က တပ်စခန်းက​နေ အပြင်ထွက်လာတဲ့ ရဲတပ်သား  ၂ ဦးကို မင်းကင်းပြည်သူ့ကာကွယ်​ရေးတပ်ဖွဲ့က ပစ်ခတ်ခဲ့တာ​ကြောင့် ၁ ဦး​သေဆုံးသွားတယ်လို့ ​ဒေသခံ​တွေက​ ပြောပါတယ်။

အဲဒီရဲ ၂ ​ယောက်ဟာ မင်းကင်းမြို့နယ် ​တောင်တွင်း​ဒေသ မုံရွာ-ယာကြီး-က​လေးဝ လမ်းပိုင်းမှာ ပစ်ခတ်ခံရတာဖြစ်ပြီး အိန္ဒိယလမ်းဆိုဒ်အနီး တပ်စွဲ​နေထိုင်တဲ့ စစ်​ကောင်စီတပ်ဖွဲ့လက်​အောက်ခံ ရဲတပ်သား​တွေဖြစ်ပါတယ်။

ရဲတပ်သား ၂ ​ဦး ဆိုင်ကယ်တစ်စီးနဲ့ မြို့မ​ကျေးရွာဘက်ကို သွားတယ်လို့ သတင်းရတာ​ကြောင့် မင်းကင်းမြို့နယ် ပြည်သူ့ကာကွယ်​ရေးတပ်ဖွဲ့က လမ်းခုလပ်တစ်နေရာမှာ ကြိုတင်​စောင့်ဆိုင်း တိုက်ခိုက်ခဲ့တာလို့ မင်းကင်း(PDF)ခေါင်း​ဆောင်တစ်ဦးက ​ပြောပါတယ်။

တိုက်ခိုက်ခံရလို့  ရဲတပ်သား ၁ ဦး ပြင်းထန်ဒဏ်ရာရရှိခဲ့ပြီး​​ အဲဒီရဲတပ်သားဟာ မြို့မ​ကျေးရွာအ​ရောက်မှာ ​သေဆုံးသွားခဲ့တယ်လို့ ဆိုပါတယ်။

မင်းကင်းမြို့နယ်အတွင်းမှာ စစ်​ကောင်စီတပ်နဲ့ ​ဒေသခံ PDF ပူး​ပေါင်းအဖွဲ့တို့ မကြာခဏ ထိ​တွေ့တိုက်ပွဲ​တွေဖြစ်ပွား​နေပြီး စစ်​ရေးအ​ခြေ​နေလည်း တင်းမာ​နေဆဲဖြစ်ပါတယ်။