ဒီးမော့ဆိုတွင် PDF စနိုက်ပါအဖွဲ့ ပစ်ခတ်မှုကြောင့် စစ်တပ်က ၆ ဦးသေဆုံး
DVB
·
March 18, 2022
ကယားပြည်နယ် ဒီးမောဆိုမြို့နယ် အိုးခူးရီးရွာမှာ တပ်စွဲထားတဲ့ စစ်ကောင်စီတပ်ကို မတ် ၁၇ ရက် နေ့လယ်က ပြည်သူ့ကာကွယ်ရေး ပူးပေါင်းစနိုက်ပါအဖွဲ့တွေ တိုက်ခိုက်ခဲ့တာကြောင့် စစ်ကောင်စီတပ်ဖွဲ့က အရာရှိတဦး အပါအဝင် ၆ ဦး သေဆုံးသွားတယ်လို့ အလယ်ပိုင်းတိုင်း အထူးစစ်ဆင်ရေးအဖွဲ့က ဒီနေ့ ကြေညာချက်ထုတ်ပြန်ပါတယ်။
အခုတိုက်ခိုက်မှုကို အလယ်ပိုင်းတိုင်း အထူးစစ်ဆင်းရေး စနိုက်ပါအဖွဲ့နဲ့ လွိုင်ကော် PDF စနိုက်ပါအဖွဲ့တို့ ပူးပေါင်းတိုက်ခိုက်ခဲ့တာလို့ ကြေညာချက်မှာ ဖော်ပြပါတယ်။
စနိုက်ပါအဖွဲ့တွေရဲ့ ပစ်ခတ်မှုကြောင့် သေဆုံးသွားတဲ့ စစ်ကောင်စီတပ်ဖွဲ့ဝင် ၆ ဦးထဲမှာ အရာရှိတဦး ပါဝင်ပြီး အလောင်းကို ရဟတ်ယာဉ်နဲ့ လာရောက်သယ်ဆောင်သွားတယ်လို့ အလယ်ပိုင်းတိုင်း အထူးစစ်ဆင်ရေးအဖွဲ့က ထုတ်ပြန်ပါတယ်။
အလယ်ပိုင်းတိုင်း အထူးစစ်ဆင်ရေးအဖွဲ့က ထုတ်ပြန်ချက်နဲပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။
