မြန်မာနိုင်ငံမှာ မတရားအာဏာသိမ်း ၁ နှစ်ကျော်ကာလ စစ်ကောင်စီတပ်တွေ အကြမ်း ဖက်ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၆၂၀ ယောက်နဲ့ မီးရှို့ဖျက်ဆီးခဲ့တဲ့ နေအိမ်အလုံး ၄၄၀ ထက်မနည်းရှိခဲ့တယ်လို့ နိုင်ငံရေးအကျဉ်းသားများကူညီစောင့် ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ မတ် ၄ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ်ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ဒီနေ့အထိ ၉၅၂၃ ယောက် လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၈၃၃ ယောက်ကတော့ ထောင်ဒဏ်ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၄၅ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

ဖမ်းဝရမ်းထုတ်ခံထားရတာကြောင့် တိမ်းရှောင်နေသူ ၁၉၇၃ ယောက်ထဲက မျက်ကွယ် သေဒဏ်ချမှတ်ခြင်းခံထားရသူ ၃၉ ယောက်အပါအဝင် ၁၁၈ ယောက်ကတော့ မျက်ကွယ် ပြစ်ဒဏ်ချခံထားရပြီး သေဒဏ်ချမှတ်ခံထားရသူ စုစုပေါင်း ၈၄ ယောက် ရှိပြီဖြစ်ပါတယ်။

ပြီးခဲ့တဲ့ မတ် ၅ ရက်ည ၇ နာရီ မိနစ် ၂၀ လောက်က ဖာပွန်မြို့အခြေစိုက် စစ်အုပ်စုတပ်က ကရင်ပြည်နယ်၊ ဖာပွန်ခရိုင်၊ ဘူးသိုမြို့နယ်အတွင်းက ကလော်ဒေးကျေးရွာဘက်ကို လက် နက်ကြီးနဲ့ ပစ်ခတ်ခဲ့တာကြောင့် ကလော်ဒေးကျေးရွာမှ ဒေသခံ ၇ ယောက် ကျဆုံးသွားခဲ့ပြီး ၄ ယောက် အပြင်းအထန် ဒဏ်ရာရရှိခဲ့ကြောင်း သိရှိရပါတယ်။ ကျဆုံးသွားခဲ့တဲ့ ဒေသခံ ၇ ယောက်ကတော့ အသက် ၂ နှစ်အရွယ် နော်တာလူ၊ အသက် ၅ နှစ်အရွယ် နော်ထူး ဖော၊ အသက် ၁၄ နှစ်အရွယ် နော်တင်နီလာဝင်း၊ အသက် ၁၉ နှစ်အရွယ် စောဒေးဖိုး၊ အ သက် ၄၀ အရွယ် စောကေ၊ အသက် ၂၂ နှစ်အရွယ် နော်အယ်မူးနဲ့ အသက် ၃၂ နှစ်အရွယ် နော်ဖောဝါးတို့ဖြစ်ကြောင်း သိရှိရပါတယ်။

ဒါ့အပြင် မတ် ၄ ရက်မနက်ပိုင်းမှာလည်း စစ်ကိုင်းတိုင်းဒေသကြီး၊ ဒီပဲယင်းမြို့နယ်အတွင်းက မင်းဆွေနှစ်ကျေးရွာကို အကြမ်းဖက်စစ်အုပ်စုတပ်က ဝင်ရောက်စီးနင်းခဲ့ပြီး ကျေးရွာလုံ ခြုံရေးအတွက် ကင်းစောင့်နေတဲ့ ဒေသခံ ၉ ယောက်ကို သတ်ဖြတ်ခဲ့ကြောင်း သိရှိရပါတယ်။ သတ်ဖြတ်ခံခဲ့ရတဲ့ ဒေသခံ ၉ ယောက်ထဲက ၅ ယောက်ကတော့ မင်းဆွေနှစ် ကျေးရွာက ကိုအောင်သူ၊ ကိုဖိုးမဲ၊ ကိုချမ်းမြေ့ဇော်၊ ကိုဘုန်းနိုင်နဲ့ ကိုပြည့်ဖြိုးအောင် တို့ဖြစ်ကြပြီး ကျန် ၄ ယောက်ကတော့ မြင်းသူကြီးကျေးရွာ၊ ကြာခတ်ကျေးရွာနဲ့တခြား ကျေးရွာတရွာတို့က ဖြစ်တယ်လို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေးကာလအတွင်း ကျဆုံးသွားသူတွေရဲ့ အချက်အလက်တွေကိုသိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီးအချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။