စစ်ကိုင်းတိုင်း၊ ယင်းမာပင်မြို့နယ်မှာ မကြာသေးခင် သီတင်းပိတ်တွေအတွင်း တိုက်ပွဲ ၁၇ ကြိမ်ဖြစ်ပွားခဲ့ပြီး စစ်ကောင်စီဘက်တပ်ဖွဲ့ဝင်အယောက် ၃၀ ထက်မနည်း သေဆုံးခဲ့တယ်လို့ မြောက်ယမား ပြည်သူ့ကာကွယ်ရေးတပ်ဖွဲ့-ယင်းမာပင်က ထုတ်ပြန်ပါတယ်။
ပြီးခဲ့တဲ့ ဖေဖော်ဝါရီ ဒုတိယပတ်နဲ့ တတိယပတ်တွေအတွင်း စစ်ကောင်စီတပ်တွေနဲ့ ခရိုင်ပူးပေါင်း(PDF)တပ်ဖွဲ့တွေအကြား တိုက်ပွဲဖြစ်ပွားခဲ့ရာမှာ စစ်ကောင်စီဘက်က ထိခိုက်ဒဏ်ရာရရှိခဲ့သူ ၅၀ ကျော်ထက်မနည်း ရှိခဲ့တယ်လို့ ဆိုပါတယ်။
ဒေသခံ ပြည်သူ့ကာကွယ်ရေးတပ်ဖွဲ့ဘက်ကတော့ ၂ ယောက် ကျဆုံးခဲ့ပြီး ၅ ယောက် ဒဏ်ရာရတယ်လို့ ထုတ်ပြန်ချက်မှာ ဖော်ပြပါတယ်။
ဒါ့အပြင် စစ်ကောင်စီတပ်တွေဟာ ယင်းမာပင်မြို့နယ်၊ ချင်းပုန်းကျေးရွာ၊ သ ပြေအေးကျေးရွာတွေက လူနေအိမ်တွေကို အကြောင်းမဲ့ မီးရှို့ခဲ့ကြတာကြောင့် အိမ်ခြေရာနဲ့ချီ ဆုံးရှုံးခဲ့ရသလို လက်ရှိအချိန်ထိ အရပ်သားပြည်သူ ၁၁ ယောက်လောက် သေဆုံးခဲ့ပြီး တချို့ကို မတရားဖမ်းဆီးခေါ်ဆောင်သွာခဲပါတယ်။
ဖေဖော်ဝါရီလအတွင်း စစ်တပ်က လေကြောင်း တိုက်ခိုက်မှု ၄ ကြိမ်တိုင်တိုင် ကျူးလွန်ခဲ့ပြီး ဒါဟာ စစ်ရာဇဝတ်မှုမြောက်တဲ့ တိုက်ခိုက်မှု ဖြစ်တယ်လို့ မြောက်ယမား ပြည်သူ့ကာကွယ်ရေး တပ်ဖွဲ့-ယင်းမာပင်က ပြောပါတယ်။
မြန်မာနိုင်ငံမှာ စစ်အာဏာသိမ်းယူထားခဲ့တာ ၁ နှစ် ကျော်လာခဲ့ပြီဖြစ်ကာ ဒီကာလအတွင်း စစ်ကောင်စီတပ်တွေနဲ့ တိုင်းရင်းသားလက်နက်ကိုင် တပ်ဖွဲ့တွေ၊ ပြည်သူ့ကာကွယ်ရေးတပ်ဖွဲ့တွေကြားကတိုက်ပွဲ ပြင်းထန်နေပြီး အခြေအနေတွေ ပိုဆိုးလာနေတာ ဖြစ်ပါတယ်။
