အင်္ဂလန်ဟာ ဇွန်လမှာ ဒီနှစ်အတွက် စံချိန်တင် အပူချိန်နဲ့ ကြုံတွေ့ခဲ့တယ်လို့ ဗြိတိန် မိုးလေဝသအဖွဲ့က ဇူလိုင် ၁ ရက်မှာ ကြေညာပါတယ်။
မိုးလေဝသရဲ့ ဖော်ပြချက်မှာ ဗြိတိန်နဲ့ ဝေးလ်တို့မှာ ၂၀၂၆ ခုနှစ်အတွင်း ဇွန်လ အပူဆုံးစံချိန်နဲ့ ကြုံတွေ့ခဲ့ပါတယ်။
ဇွန်လက အပူလှိုင်းဖြတ်မှုတွေကြောင့် အင်္ဂလန်မှာ အပူပိုင်းဒေသ ညတွေလိုမျိုး အပူချိန်တွေ မြင့်ခဲ့တယ်လို့ ဆိုပါတယ်။
ဇွန် ၂၆ ရက်က နော်ဖော့မှာရှိတဲ့ လင်းဝုဒ်မှာ ၃၇ ဒသမ ၇ ဒီဂရီ ဆဲလ်စီးယပ်အထိ ရှိခဲ့ပြီး ၂၀ ရာစုအတွင်း ဇွန်လ စံချိန်တင်ခဲ့တာ ဖြစ်ပါတယ်။ ဒါဟာ ၁၉၅၇ ခုနှစ်စံချိန်ကို ကျော်ဖြတ်ပြီး ၁၉၇၆ ခုနှစ်က ဇွန်လ စံချိန်နဲ့ တူခဲ့တာပါ။
စကော့တလန်နဲ့ မြောက်အိုင်ယာလန်တို့မှာလည်း အပူချိန်တွေ စံချိန်တင်ခဲ့တယ်လို့ မိုးလေဝသဌာနက ဖော်ပြပါတယ်။
ဥရောပတိုက်မှာ အပူလှိုင်း ဖြတ်သန်းမှုနဲ့ ပတ်သက်ပြီး အာဏာပိုင်တွေက သတိပေးမှုတွေ ပြုလုပ်ထားတယ်လို့လည်း ရိုက်တာက ဖော်ပြပါတယ်။
စပိန်နိုင်ငံမှာ အပူလှိုင်းဖြတ်တာကြောင့် ဇွန်လမှာ သေဆုံးသူ ၁,၀၂၉ ယောက်အထိ ရှိတယ်လို့ ခန့်မှန်းရပါတယ်။
ဒါဟာ ၂၀၁၅ ခုနှစ် ဇွန်လက အပူလှိုင်းကြောင့် သေဆုံးခဲ့ဖူးတဲ့နှုန်းထက် အပူချိန်ကြောင့် သေဆုံးသူ ဦးရေအများဆုံးလည်း ဖြစ်ပါတယ်။
အပူချိန်မြင့်မားမှုကြောင့် လူတွေ တိုက်ရိုက်သေဆုံးမှုတွေ ရှိသလို အပူချိန်ကြောင့် ကျန်းမာရေး အခြေအနေတွေလည်း မြင့်တက်လာတာပဲ ဖြစ်ပါတယ်။
ပြီးခဲ့တဲ့လက စပိန်နိုင်ငံမှာ အပူချိန်က ပုံမှန်ထက် ၃ ဒသမ ၂ ဒီဂရီဆဲလ်စီးယပ် ပိုများပြီး စပိန်နိုင်ငံရဲ့ ဒုတိယမြောက်အပူဆုံးစံချိန် တင်ခဲ့တယ်လို့ စပိန်အခြေစိုက် မိုးလေဝသဌာနက ပြောပါတယ်။
ပေါ်တူဂီနိုင်ငံမှာလည်း အပူလှိုင်းသတိပေးချက်တွေ ထုတ်ပြန်ထားပြီး တောမီး လောင်ကျွမ်းနိုင်ခြေ ရှိမှုတို့ ကာကွယ်ဖို့နဲ့ လုပ်အားပေးအဖွဲ့ အရေအတွက် တိုးချဲ့တာတွေ လုပ်ထားပါတယ်။
လာမဲ့နေ့တွေမှာ အပူချိန် ၄၇ ဒီဂရီဆဲလ်စီးယပ်အထိ မြင့်တက်နိုင်ခြေရှိတယ်လို့ ပြည်ထဲရေးဝန်ကြီးက ဗုဒ္ဓဟူးနေ့မှာ သတိပေးထားပါတယ်။
စိုက်ပျိုးရေးလုပ်ငန်းတွေမှာ မီးရှို့တာတွေ မလုပ်ဖို့၊ လေဟာပြင်မှာ မီးမရှို့ဖို့၊ အသားကင်တာ၊ မီးစလောင်စေတဲ့ စက်ပစ္စည်း အသုံးပြုမှုတွေလည်း မလုပ်ဖို့ တားမြစ်ထားပါတယ်။
မဆင်မခြင် ဆေးလိပ်မီး စွန့်ပစ်မှုနဲ့ ခြောက်သွေ့ပင်တွေရှိတဲ့ ဒေသတွေမှာ ကားမရပ်ဖို့ဆိုတဲ့ သတိပေးချက်တွေလည်း ပေါ်တူဂီပြည်ထဲရေးဝန်ကြီးက သတိပေးထားပါတယ်။
ဂျာမနီ၊ ချက်၊ ပိုလန်နဲ့ ဒိန်းမတ် နိုင်ငံတို့မှာလည်း ပြီးခဲ့တဲ့အပတ်က အပူချိန် စံချိန်တင်ခဲ့တာ တွေ့ရပါတယ်။
Source: Reuters
