ထိုင်းနိုင်ငံမြောက်ပိုင်း ဗိစနုလုတ်ခရိုင် ဗိစနုလုတ်မြို့ရှိ ကြက်သားစက်ရုံတစ်ခုမှာ ဥပဒေနဲ့မညီ အလုပ်ဝင်လုပ်နေတဲ့ မြန်မာလုပ်သား ၁၁၂ ဦး ဖမ်းဆီးခံရပြီး ၁၆ ဦးမှာ ကိုဗစ်-၁၉ ကူးစက်ခံထားရကာ ၂၁ ဦးက ပိုးတွေ့သူနဲ့နီးစပ်မှုရှိတာ တွေ့ရတယ်လို့ naewna ထိုင်းသတင်းမှာ ဖော်ပြပါတယ်။ 

ဗိစနုလုတ်မြို့ ကလန့်ရပ်ကွက် PPF ကြက်သားစက်ရုံထဲမှာ တရားမဝင်အလုပ်သမားတွေ ရှိနေကြောင်း သတင်းပေးပို့ချက်ရတဲ့အတွက် ခရိုင်အုပ်ချုပ်ရေးဌာန၊ နယ်မြေခံရဲ၊ ကမ္ဘာလှည့်ခ ရီးသွားရဲ၊ လဝက နဲ့ အလုပ်သမားရုံးက တာဝန်ရှိသူတွေဟာ ဖေဖော်ဝါရီ ၂၂ က အဆိုပါစက်ရုံကို သွားရောက်စစ်ဆေးခဲ့ကြပါတယ်။ 

စစ်ဆေးချက်အရ အထောက်အထားမဲ့၊ အထောက်အထားမပြည့်စုံဘဲ ဝင်ရောက်လုပ်ကိုင်နေတဲ့ အလုပ်သမား ၁၁၂ ဦးကို တွေ့ရှိပြီး အားလုံးဟာ မြန်မာနိုင်ငံသားတွေလို့ တာဝန်ရှိသူက ပြောပါတယ်။ 

ကိုဗစ်-၁၉ ရောဂါပိုးစစ်ဆေးရာမှာတော့ ၁၆ ဦး ပေါ့စ်တစ်ဖြစ်ပြီး ပိုးရှိသူနဲ့ဆက်စပ်သူပေါင်း ၂၁ ဦး ရှိတယ်လို့ ဆိုပါတယ်။ 

ပိုးကူးစက်သူနဲ့ ဆက်စပ်သူတွေကို သီးသန့်ခွဲထုတ်နေရာချထားပြီး အလုပ်ရှင်နဲ့တကွ တရားမဝင်အလုပ်သမားတွေကို ဥပဒေအတိုင်း အရေးယူဆောင်ရွက်သွားမယ်လို့ တာဝန်ရှိသူက ပြေပါတယ်။  

ထိုင်းအလုပ်သမားဥပဒေအရ အလုပ်ရှင်ဟာ တရားမဝင်အလုပ်သမား ငှါးရမ်းခန့်ထားပါက အလုပ်သမား ၁ ဦးအတွက် ဒဏ်ငွေ အနည်းဆုံး ဘတ် ၁၀,၀၀၀ မှ ၁၀၀,၀၀၀ ထက်မပို၊ ပြစ်မှုဆင့်ကဲကျူးလွန်က ၁ နှစ်ထက်မပိုတဲ့ ထောင်ဒဏ် ဒါမှမဟုတ် ဘတ် ၅၀,၀၀၀ မှ ၂၀၀,၀၀၀ ထိ ဒါမှမဟုတ် ထောင်ဒဏ်ရောငွေဒဏ်ပါ နှစ်မျိုးလုံးကျခံရမယ်လို့ ဆိုပါတယ်။ 

အလုပ်သမားဘက်ကလည်း ခွင့်ပြုချက်မရှိဘဲ အလုပ်လုပ်ပါက ဒဏ်ငွေ ဘတ် ၅,၀၀၀ မှ ၅၀,၀၀၀ ထိ ပေးဆောင်ရမှာဖြစ်ပြီး ပြည်နှင်ဒဏ်ပေးခံရမှာ ဖြစ်ပါတယ်။