ကယားပြည်နယ်၊ ဒီးမော့ဆိုမြို့နယ်မှာ ဖေဖော်ဝါရီ ၂၂ ရက်က ဖြစ်ပွားခဲ့တဲ့ တိုက်ပွဲအတွင်း စစ်ကောင်စီဘက်က ၁၀ ယောက်ထက်မနည်း သေဆုံးခဲ့တယ်လို့ ပြည်သူ့ကာကွယ်ရေးတပ်-ဒီးမော့ဆို (DMO-Local PDF) က ထုတ်ပြန်ထားပါတယ်။

ဒီးမော့ဆိုမြို့နယ်၊ လီဝိုးကျေးရွာအနီးနဲ့ ဝီသဲကူးကျေးရွာတွေကို အင်အားအလုံးအရင်းနဲ့ ထိုးစစ်ဆင်လာတဲ့ စစ်ကောင်စီတပ်ဖွဲ့ကို ပြည်သူ့ကာကွယ်ရေးတပ်-ဒီးမော့ဆို(DMO-Local PDF)၊ လွိုင်ကော်(PDF)၊ KNDF၊ KA နဲ့ တခြားတော်လှန်ရေးတပ်ဖွဲ့တွေ ပူးပေါင်းတိုက်ခိုက်ခဲ့ကြတာ ဖြစ်ပါတယ်။

အဆိုပါတိုက်ပွဲဟာ တနေကုန်နီးပါးဖြစ်ပွားခဲ့ပြီး ညနေ ၃ နာရီလောက်မှာတော့ အကြမ်းဖက်စစ်ကောင်စီဘက်က ရဟတ်ယာဉ် ၁ စီးနဲ့ ၅ ကြိမ်လောက် ပစ်ကူတိုက်ခိုက်ခဲ့တဲ့အပြင် ညနေ ၄ နာရီလောက်မှာလည်း တိုက်‌လေယာဉ် ၂ စီးနဲ့ ၇ ကြိမ်ထက်မနည်း ဗုံးကြဲတိုက်ခိုက်ခဲ့တယ်လို့ ဆိုပါတယ်။

ပြည်သူ့ကာကွယ်ရေးတပ်-ဒီးမော့ဆို(DMO-Local PDF) ဘက်ကတော့ ထိခိုက်ဒဏ်ရာရရှိ မှုမရှိ ခုခံတိုက်ခိုက်နိုင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒီးမော့ဆိုမြို့နယ်တိုက်ပွဲဟာ ၇ ရက်မြောက်နေ့အဖြစ် ဆက်လက်ပြင်းထန်နေပြီး အကြမ်းဖက် စစ်ကောင်စီတပ်ဘက်က လေကြောင်းနဲ့ ရက်ဆက်ဗုံးကြဲတိုက်ခိုက်ခဲ့တဲ့အပြင် မိုးဗြဲ အခြေစိုက်(ခမရ-၄၂၂)တပ်၊ လွိုင်ကော်အခြေစိုက်(ခလရ-၂၅၀)တပ်နဲ့ ဒီးမော့ဆိုအခြေ စိုက်(ခမရ-၄၂၇) တပ်တွေက တာဝေးပစ်အမြောက်တွေ အသုံးပြုကာ ပစ်ကူတိုက်ခိုက်နေခဲ့တာလို့ သိရပါတယ်။