၂၀၂၁−၂၀၂၂ကြားကာလ ဘတ်ဂျတ် ၄ လအတွင်း မြန်မာနိုင်ငံရဲ့ ကုန်သွယ်မှုပမာဏာဟာ ပြီးခဲ့တဲ့နှစ် ကာလတူ ကုန်သွယ်မှုနဲ့ ယှဥ်ရင် ၁၂ ရာခိုင်နှုန်း လျော့နည်းကျဆင်းနေတယ်လို့ စစ်ကောင်စီရဲ့ စီးပွားရေးနဲ့ ကူးသန်းရောင်း၀ယ်ရေး၀န်ကြီးဌာနက တရား၀င်ထုတ်ပြန်တဲ့စာရင်းအရ သိရပါတယ်။
ပြီးခဲ့တဲ့ ၂၀၂၀−၂၀၂၁ ဘဏ္ဍာနှစ် အောက်တိုဘာ ၁ ရက်ကနေ ဖေဖော်၀ါရီ ၄ ရက် အထိ ၄ လကျော်ကာလအတွင်း ကုန်သွယ်မှုက အမေရိကန်ဒေါ်လာ ၁၂ ဒသမ ၀၅၄ ဘီလီယံထိရှိခဲ့ပြီး၊ အခုနှစ် ကြားကာလ မီနီဘတ်ဂျတ် ၄လအတွင်း ကုန်သွယ်မှု ပမာဏက အမေရိကန်ဒေါ်လာ ၁၀ ဒသမ ၅၂၀ ဘီလီယံ သာ ကုန်သွယ်မှုရှိခဲ့တာကြောင့် အမေရိကန်ဒေါ်လာ ၁ ဒသမ ၅၃၃ ဘီလီယံ ကျော် လျော့ကျခဲ့ပါတယ်။
ပို့ကုန်တန်ဖိုး အမေရိကန်ဒေါ်လာ သန်း ၅၅၀ကျော် လျော့ကျခဲ့သလို၊ သွင်းကုန်တန်ဖိုးကလည်း အမေရိကန်ဒေါ်လာ သန်း ၉၈၀ ကျော် လျော့ကျခဲ့ပါတယ်။ ပင်လယ်ရေကြောင်းကုန်သွယ်မှု အနည်းငယ်ပြန်လည် အားကောင်းလာပေမဲ့ နယ်စပ်ကုန်သွယ်ရေးမှုက ယမန်နှစ်ကာလတူထက် ကန်ဒေါ်လာ ၂ ဒသမ ၀၇၃ဘီလီယံ ကျော် လျော့ ကျနေပါတယ်။
ထိုင်းနိုင်ငံနဲ့ နယ်စပ်ကုန်သွယ်မှုက ပြီးခဲ့တဲ့နှစ်ထက် မြင့်တက်နေပေမဲ့ အဓိကကုန်သွယ်ဖက် တရုတ် နိုင်ငံအပြင် ကျန်အိမ်နီးချင်းနိုင်ငံတွေဖြစ်တဲ့ အိန္ဒိယ၊ ဘင်္ဂလားဒေ့်၊ လာအိုနိုင်ငံတို့နဲ့ ကုန်သွယ်မှုလည်း ကျဆင်း ခဲ့ပါတယ်။
အဲဒီထဲမှာ တရုတ်နိုင်ငံနဲ့ နယ်စပ်ကုန်သွယ်မှုက ပြီးခဲ့တဲ့နှစ်ထက် အမေရိကန်ဒေါ်လာ ၂ ဒသမ ၁၆၆ ဘီလီယံကျော်ထိ လျော့နည်းကျဆင်းခဲ့တာပါ။
မြန်မာနိုင်ငံနဲ့ နယ်နမိတ်ချင်း ထိစပ်နေတဲ့ နယ်စပ်ကုန်သွယ်ရေးစခန်းတွေထဲမှာ အဓိက အများဆုံး ကုန်သွယ်မှု ပြုလုပ်တဲ့ မူဆယ်ကုန်သွယ်ရေးစခန်းမှာ အမေရိကန်ဒေါ်လာ ၁ ဒသမ ၇ ဘီလီယံကျော်ထိ ကျဆင်းခဲ့ပါတယ်။
