ရှမ်းပြည်နယ် တောင်ပိုင်း ရပ်စောက်မြို့နယ်မှာ ဖေဖော်ဝါရီ ၈ ရက် မနက်ပိုင်းက SSPP/SSA နဲ့ RCSS/SSA တို့ တိုက်ပွဲဖြစ်ခဲ့ပြီး RCSS ၁၉၈ တပ်မဟာမှူးအပါအဝင် တပ်ဖွဲ့ဝင်တွေနဲ့ လက်နက်ခဲယမ်းတွေ ဖမ်းဆီးရမိခဲ့တယ်လို့ SSPP/SSA ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်က ဒီဗွီဘီသတင်းဌာနကို ပြောပါတယ်။
ရှမ်းပြည်တိုးတက်ရေးပါတီ (SSPP/SSA) နဲ့ ရှမ်းပြည်ပြန်လည်ထူထောင်ရေးကောင်စီ (RCSS/SSA) တို့ဟာ ရှမ်းပြည်နယ် မြောက်ပိုင်းနဲ့ ရှမ်းပြည်နယ်တောင်ပိုင်း နေရာအတော်များများမှာ တိုက်ပွဲဖြစ်နေပြီး RCSS တပ်မဟာမှူးဖမ်းဆီးခံရတာနဲ့ ပတ်သက်ပြီး တိတိကျကျ သတင်းမရသေးဘူလို့ RCSS ပြောခွင့်ရသူ ဗိုလ်မှူးခမ်းစံက ဆိုပါတယ်။
နှစ်ဖက်အင်အား အများအပြားနဲ့ ရပ်စောက်မြို့နယ် ကျောက်ဂူတိုက်နယ်အတွင်းမှာ ဖေဖော်ဝါရီလ ၈ ရက်နေ့နဲ့ ၉ ရက်နေ့တွေမှာ တိုက်ပွဲပြင်ထန်ခဲ့ပြီး ဒီကနေ့အထိ ဖြစ်ပွားနေဆဲဖြစ်တယ်လို့ သိရပါတယ်။
ဖေဖော်ဝါရီ ၉ ရက်နေ့က ရှမ်းလက်နက်ကိုင်တော်လှန်ရေးအဖွဲ့ ၂ ဖွဲ့ဖြစ်ပွားခဲ့တဲ့ ကျောက်ဂူတိုက်နယ်က တိုက်ပွဲအတွင်းမှာ အာဏာသိမ်းစစ်ကောင်စီက လေယာဉ် ၂ စီး နဲ့ ဗုံး ၈ လုံးခန့် ကြဲချခဲ့တာကြောင့် SSPP/SSA ဘက်က တပ်သား ၂ ယောက် ထိခိုက်ဒဏ်ရာရှိခဲ့ပါတယ်။
အခုလို စစ်ကောင်စီက ကြားကနေ ဝင်ရောက် ဗုံးကြဲတိုက်ခိုက်တဲ့အပေါ် ဘယ်အဖွဲ့ဘက်က ကူညီတိုက်ခိုက်ပေးနေသလဲဆိုတာနဲ့ပတ်သက်ပြီး ရှမ်းလက်နက်ကိုင်တော်လှန်ရေးအဖွဲ့ ၂ ဖွဲ့ကြားမှာ အပြန်အလှန် စွပ်စွဲပြောဆိုမှုတွေရှိနေပါတယ်။
SSPP က ဆက်လက် နယ်မြေရှင်းလင်းစဉ် ရှမ်းတော်လှန်ရေးနှစ်ဖွဲ့ကြား ရပ်စောက်မြို့နယ်၊ ကျောက်ဂူတိုက်နယ်မှာ တိုက်ပွဲတွေ ဆက်လက်ဖြစ်ပွားခဲ့ပြီး ပြည်သူပိုင်အဆောက်အဦအချို့ မီးလောင်ပျက်စီးခဲ့တယ်လို့ ဒေသခံတွေဆီက သိရပါတယ်။
ရပ်စောက်မြို့နယ်၊ ကျောက်ဂူတိုက်နယ်ဟာ ရှမ်းပြည်နယ် မြောက်ပိုင်းနဲ့ တောင်ပိုင်းကို ဆက်သွယ်ထားသော ကားလမ်းပေါ် တည်ရှိပြီး အဆိုပါ လမ်းမကြီးပေါ်မှာလည်း တိုက်ပွဲတွေ ဖြစ်ပွားနေတာဖြစ်ပြီး ကျေးရွာပေါင်း ၂၀ ကျော်မှ ဒေသခံတွေ စစ်ဘေးရှောင်နေကြရတယ်လို့ သိရပါတယ်။
