မြန်မာနိုင်ငံမှာ စစ်တပ်အာဏာသိမ်းပြီးတဲ့နောက် နိုင်ငံရေးမတည်ငြိမ်မှု၊ အသက်အိုးအိမ်စည်းစည်လုံခြုံမှုမရှိတာနဲ့ စားဝတ်နေရေးအခက်အခဲတွေကြောင့် ထိုင်းနိုင်ငံထဲကို တရားမဝင် ဝင်ရောက်လုပ်ကိုင်ဖို့ကြိုးစားရာမှ နေ့စဉ်ပျှမ်းမျှ ရာချီ အဖမ်းဆီးခံနေရပြီး မနေ့ကလည်း ကန်ကျနပူရီခရိုင်မှာ ၂၃၅ ဦး ဖမ်းဆီးခံရပါတယ်။
ဇန်နဝါရီ ၃၁ ရက် ညနေ ၆ နာရီအချိန်က ဘန့်ကောဝ်မြို့နယ် ဟွေ့နမ့်ခေါဝ်ကျေးရွာအုပ်စုထဲမှာ ၈၈ဦး (ကျား ၆၀ + မ ၂၈ )၊ အဆိုပါအုပ်စုထဲမှာဘဲ ညနေ ၆ နာရီခွဲမှာ နောက်ထပ် ၉၇ ဦး (ကျား၆၀ + မ ၃၇) နဲ့ ည ၇ နာရီလောက်က ဆန်ခလပူရီ နောင်လူးကျေးရွာအုပ်စုထဲမှာ အယောက် ၅၀ (ကျား ၃၁ + မ ၁၉) စုစုပေါင်း ၂၃၅ ဦး ဖမ်းဆီးခံရတယ်လို့ ကန်ကျနပူရီဒေသတွင်းသတင်းမှာ ဖော်ပြပါတယ်။
သူတို့တွေဟာ ပဲခူး၊ မော်လမြိုင်၊ ရခိုင်၊ မကွေး၊ ရန်ကုန်၊ ဧရာဝတီ စတဲ့ဒေသတွေကလာပြီး စမွတ်စခွန်း၊ ချွန်းပူးရီး၊ ကန်ကျနပူရီ၊ ရာ့ချ်ပူရီ နဲ့ ဘန်ကောက်မှာ အလုပ်သွားလုပ်ဖို့ဖြစ်ကြောင်း၊ ပွဲစားအား ၁ ဦးကို ဘတ် ၂ သောင်းမှ ၃ သောင်းထိ ပေးခဲ့ရတယ်လို့ ဆိုပါတယ်။
ဇန်နဝါရီ ၃၀ ရက်နေ့ကလည်း ဆိုင်းယုတ်မြို့နယ်က နေရာ၂ ခု နေ့ခင်း ၁၂ နာရီခွဲမှာ ၅၄ ဦး၊ ညနေ ၆ နာရီမှာ ၅၁ ဦး ဖမ်းဆီးခံခဲ့ရပါသေးတယ်။
ဆိုင်းယုတ်မြို့နယ်ထဲမှာ ၂၈ ရက်နေ့ညက တရားမဝင်မြန်မာ ၁၀ ဦး တင်ဆောင်လာတဲ့ ကားတစ်စီး စစ်ဆေးရေးဂိတ်မှာ အစစ်မခံဘဲ မောင်းပြေးလို့ လုံခြုံရေးတပ်ဖွဲ့ဝင်က သေနတ် ၅ ချက်ပစ်ခတ်ခဲ့ရာ မြန်မာလုပ်သား ၁ ဦးသေဆုံးပြီး ၁ ဦးပြင်းစွာ ဒဏ်ရာရခဲ့ပါတယ်။
