အာဏာသိမ်းစစ်ကောင်စီကို ဒေါ်လာသန်းနဲ့ချီ ဝင်ငွေရှာပေးနေတဲ့ ပြင်သစ်စွမ်းအင်ကုမ္ပဏီ Total Energies နဲ့ အမေရိကန်စွမ်းအင်ကုမ္ပဏီ Chevron တို့ မြန်မာနိုင်ငံကနေ ထွက်ခွာဖို့ ဆုံးဖြတ်လိုက်တဲ့အပေါ် အမျိုးသားညီညွတ်ရေးအစိုးရ (NUG) က ကြိုဆိုကြောင်းနဲ့ မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE) ဆီ ငွေစာရင်းမလွှဲဖို့ တောင်းဆိုထုတ်ပြန်ထားပါတယ်။
ဇန်နဝါရီ ၂၃ ရက်စွဲနဲ့ ထုတ်ပြန်ကြေညာချက်မှာတော့ အဆိုပါကုမ္ပဏီတွေအနေနဲ့ အမျိုးသားညီညွတ်ရေးအစိုးရ၊ လျှပ်စစ်နှင့်စွမ်းအင်ဝန်ကြီးဌာနက ချမှတ်ထားတဲ့ အမိန့်နဲ့ ညွှန်ကြားချက်တွေကို လိုက်နာဆောင်ရွက်ရမှာဖြစ်ကာ သဘာဝဓာတ်ငွေ့ အခွန်အခတွေကို အစိုးရရဲ့ ဥပဒေကဲ့သို့ အာဏာတည်သောအမိန့်(၁/၂၀၂၁)အရ ဒုတိယဝန်ကြီးက ညွှန်ကြားတဲ့ ငွေစာရင်းတွေဆီကိုသာ လွှဲအပ်ပေးပို့ကြရမယ်လို့ ဆိုပါတယ်။
Total Energies နဲ့ Chevron ကုမ္ပဏီတွေအနေနဲ့ မြန်မာနိုင်ငံက မထွက်ခွာခင်အချိန်ထိ အဆိုပါ အမိန့်တွေအတိုင်း လိုက်နာသင့်ကြောင်းနဲ့ အထူးသဖြင့် တရားဝင် လုပ်ငန်းဆောင်ရွက်နေတဲ့ Total အနေနဲ့ ဓာတ်ငွေ့ဝယ်ယူတဲ့ PTT ကို ဝန်ကြီးဌာနက ညွှန်ကြားတဲ့ ငွေစာရင်းတွေဆီကိုသာ လွှဲအပ်ဖို့ အသိပေးအကြောင်းကြားရမယ်လို့ ဖော်ပြထားပါတယ်။
