စစ်ကောင်စီတပ်နဲ့ ဒေသခံပြည်သူ့ကာကွယ်ရေးတပ်တွေ တိုက်ပွဲဖြစ်ပွားနေတာကြောင့် ချင်းပြည်နယ် ဖလမ်းမြို့နယ် ဝေဘူလမြို့အနီး ကျေးရွာ ၈ ရွာက ပြည်သူ ၃ ထောင်နီးပါး ဘေးလွတ်ရာ ထွက်ပြေးတိမ်းရှောင်နေရတယ်လို့ စစ်ဘေးရှောင်နေသူတွေက ပြောပါတယ်။
ပါးရ်သဲ၊ လုမ်ဘမ် နဲ့ ဖလမ်း-ကလေး လမ်းမကြီးပေါ်က ကျေးရွာသားတွေဟာ ဘေးလွတ်ရာကို တိမ်းရှောင်နေကြရတာ ဖြစ်ပါတယ်။
“မနေ့ကရော ဒီနေ့ရော တိုက်ပွဲဖြစ်တာ အကြာကြီးပဲ။ ရွာထဲကိုလက်နက်ကြီးတွေ ကျကျလာတယ် ထွက်ပြေးကြတာပေါ့။ အခုထိ မပြန်ရဲသေးဘူး။ သူတို့လည်း တိုက်ပွဲဆက်ဖြစ်နေကြသေးတယ်” လို့ စစ်ဘေးတိမ်းရှောင်နေသူဒေသခံတစ်ဦးကပြောပါတယ်။
ချင်းပြည်နယ်၊ ဖလမ်းမြို့နယ် ၊ ပါရ်သဲ ကျေးရွာနဲ့ လုမ်ဘမ်ကျေးရွာအနီးမှာ ဇန်နဝါရီ ၁၆ ရက်နေ့ မနက် ၇ နာရီကနေ ညနေ ၆ နာရီအထိ စစ်ကောင်စီတပ်နဲ့ ဒေသခံ ချင်းပူးပေါင်းတပ်တို့ တိုက်ပွဲဖြစ်ပွားခဲ့ကြပြီး စစ်ကောင်စီဘက်က အသေအပျောက်များ နိုင်တယ်လို့ CNDF က သိရပါတယ်။
ဖလမ်းတပ်ကုန်းကနေ အဝေးပစ်လက်နက်ကြီး ၁၂၀ မမနဲ့ နှစ်ကြိမ် ပစ်ခတ်ခဲ့ပေမဲ့ CNDF ဘက်က ထိခိုက်ဒဏ်ရာရရှိသူမရှိခဲ့ဘူးလို့ သိရပါတယ်။
စစ်ကောင်စီတပ်ဟာ ကလေးမြို့နယ် ချောင်းခွကျေးရွာဘက်ကို အင်အား ၂၅၀ လောက်နဲ့ ချီတက်ခဲ့ပြီး ဖလမ်းမြို့နယ် ဗားရ်တံတား ကင်းစခန်းမှာ အင်အား ၁၀၀ လောက် ကျန်ရစ်ခဲ့တယ်လို့သိရပါတယ်။ အင်အား ၁၅၀ လောက်နဲ့ ဖလမ်း-ကလေး လမ်းမကြီးပေါ်က ပါးရ်သဲ ကျေးရွာဘက်ကို ပြန်ဆင်းသွားတယ်လို့ ဒေသခံတွေက ဆိုပါတယ်။
ဇန်နဝါရီ ၁၅ ရက်နေ့ မနက် ၁၀ နာရီလောက်ကနေ ညနေ ၅ နာရီခွဲလောက်အထိ ပါရ်သဲ ကျေးရွာအနီးမှာ စစ်ကြောင်းထိုးလာတဲ့ စစ်ကောင်စီတပ်နဲ့ ဒေသခံပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့ကြပြီး ပြည်သူ့ကာကွယ်ရေးတပ်ဖွဲ့တွေက မိုင်းအတွဲလိုက်နဲ့ တိုက်ခိုက်ရာမှာ စစ်ကောင်စီ ၄ ဦးသေဆုံးပြီး ၁၀ ဦး ထိခိုက်ဒဏ်ရာရရှိခဲ့တယ်လို့ ချင်းအမျိုးသားအဖွဲ့ချုပ်က သိရပါတယ်။
နှစ်ဖက်တိုက်ပွဲဟာ ၇ နာရီလောက်အထိ ကြာမြင့်ခဲ့ပြီး ဇန်နဝါရီ ၁၆ ရက်နေ့ တိုက်ပွဲမှာတော့ ၁၁ နာရီလောက်အထိ ကြာမြင့်ခဲ့ပါတယ်။
စစ်ကောင်စီတပ်နဲ့ ချင်းပူးပေါင်းတပ်တို့ ကလေးမြို့နဲ့တီးတိန်မြို့လမ်းကြောင်းမှာလည်း တိုက်ပွဲဖြစ်ပွားရာမှာ စစ်ကောင်စီတပ်သား ၂ ဦးရဲ့အလောင်းတွေကို တွေ့ရှိခဲ့ရပြီး လက်နက် ၄ လက်နဲ့ ခဲယမ်းကျည်တွေကိုလည်း သိမ်းဆည်းရမိခဲ့တယ်လို့ ချင်းပူးပေါင်းတပ်ဖွဲ့တွေက သိရပါတယ်။
တိုက်ပွဲမှာ စစ်ကောင်စီတပ်က ဂျက်လေယာဉ်နဲ့ ပစ်ခတ်ခဲ့တာကြောင့် ချင်းကာကွယ်ရေးတပ်သားတွေ ထိခိုက်ဒဏ်ရာ ပြင်းထန်စွာရရှိခဲ့ပြီး CAN ပြည်သူ့ကာကွယ်ရေးတပ်ဖွဲ့က တပ်ကြပ်ကြီးတစ်ဦး သေဆုံးခဲ့တယ်လို့သိရပါတယ်။
