ထိုင်းနိုင်ငံအနောက်ပိုင်း ပရကျူတ်ခီရီခန်ခရိုင်ထဲမှာ ဇန်နဝါရီ ၂ ရက်က တရားမဝင် ဝင်ရောက်လာတဲ့ မြန်မာလုပ်သား ၄၂ ဦး ဖမ်းဆီးခံခဲ့ရတယ်လို့ ထိုင်းတပ်မတော်ပြန်ကြားရေးသတင်း Army PR Center က ထုတ်ပြန်ထားပါတယ်။
နယ်ခြားစောင့်တပ်၊ နယ်မြေခံရဲနဲ့ အုပ်ချုပ်ရေးဘက်က တာဝန်ရှိသူတွေဟာ အဲဒီနေ့မနက် ၅ နာရီခွဲက ပရကျူတ်ခီရီခန်မြို့နယ်ထဲမှာ စောင့်ကြပ်စစ်ဆေးစဉ် ဘော်နောက်အုပ်စု ဆောင်ဖိနောင့် ကျေးရွာကားလမ်းအပိုင်းမှာ တရားမဝင်အလုပ်သမားတွေ တင်လာတဲ့ ကား ၂ စီး နဲ့ လမ်းပြ ၂ ဦး တို့ကို ဖမ်းဆီးရမိခဲ့တာ ဖြစ်ပါတယ်။
အဆိုပါကား ၂ စီးပေါ်မှာ အမျိုးသား ၂၄ ဦး၊ အမျိုးသမီး ၁၈ ဦးအပါအဝင် တရားမဝင်မြန်မာလုပ်သား ၄၂ ဦး ပါဝင်ပြီး ထားဝယ်၊ ပဲခူး၊ မော်လမြိုင်၊ ရန်ကုန်မြို့တွေကနေ ထိုင်းနိုင်ငံ ဘန်ကောက်၊ စမွတ်စခွန်း၊ စမွတ်ပရကန်၊ ဆုဖန်းပူရီ ၊ ချွန်းပူရီ၊ ရာ့ချ်ပူရီတွေမှာ အလုပ်သွားလုပ်ဖို့ ပွဲစားကို တစ်ဦးလျှင် ဘတ် ၁၅၀၀၀ စီပေးပြီးဝင်လာခဲ့တာလို့ ဆိုပါတယ်။
တာဝန်ရှိသူမှ သူတို့ကို ကိုယ်ပူချိန်တိုင်း၊ ကိုဗစ်-၁၉ စစ်ဆေးပြီး လဝကဥပဒေနဲ့ ဆက်လက် အရေးယူသွားမယ်လို့ဆိုပါတယ်။
မြန်မာနိုင်ငံမှာ စစ်အာဏာသိမ်းပြီးတဲ့နောက် နိုင်ငံရေးမတည်ငြိမ်၊ အသက်အိုးအိမ်လုံခြုံမှုမရှိ၊ စီးပွားရေးကျပ်တည်းတာတွေကြောင့် ထိုင်းနိုင်ငံထဲကို ထွက်ပြေးခိုဝင်လာသူတွေ နေ့စဉ်လိုရှိနေကာ ပြီးခဲ့တဲ့ရက်ပိုင်း ဒီဇင်ဘာ ၃၀ နဲ့ ၃၁ ရက်မှာ ပရကျူတ်ခီရီခန်၊ ကန်ကျနပူရီ၊ တာ့ခ် ၊ ချင်းမိုင်နဲ့ မယ်ဆိုင်စတဲ့ နယ်စပ်ဘက်ကနေ တရားမဝင် ဝင်ရောက်သူစုစုပေါင်း ၃၁၆ ဦး ဖမ်းဆီးခံခဲ့ရပါတယ်။
ကိုးကား-Army PR Center
