စစ်ကိုင်းတိုင်း ယင်းမာပင်မြို့နယ် ဘန့်​ဘွေး​ရွာမ ကျေးရွာအနီးမှာ စစ်​ကောင်စီတပ်ဖွဲ့နဲ့ ​ဒေသခံ PDF ပူး​ပေါင်းတပ်ဖွဲ့တို့ ဒီဇင်ဘာ ၂၃ ရက် မနက်ပိုင်းက တိုက်ပွဲဖြစ်ပွားခဲ့တယ်လို့ သိရပါတယ်။

ဒီ​နေ့ မနက်ပိုင်း ၉ နာရီဝန်းကျင်​လောက်က စတင်တိုက်ပွဲဖြစ်ပွားခဲ့တာဖြစ်ပြီး နယ်​မြေ ရှင်းလင်း​ရေးပြုလုပ်နေတဲ့ စစ်​ကောင်စီတပ်ဖွဲ့တွေဟာ ​ကျေးရွာအတွင်းက ပြည်သူ​တွေရဲ့ ပစ္စည်းဥစ္စာတွေ ယူ​ဆောင်တာအပြင် နေအိမ်တွေကို ဖျက်ဆီးခဲ့တာ​ကြောင့် အခုလို တိုက်ပွဲဖြစ်ပွားရတာလို့ သိရပါတယ်။ 

အဲဒီလို လုပ်​ဆောင်တာ​တွေအပြင် စစ်​ကောင်စီတပ်ဖွဲ့​တွေဟာ ထွက်​ပြေးတိမ်း​ရှောင်ကြတဲ့ ပြည်သူတွေကိုလည်း ​သေနတ်နဲ့ပစ်ခတ်ခဲ့တာကြောင့် ပြည်သူ  ၂ ဦး ထက်မနည်း ဒဏ်ရာရရှိခဲ့တယ်လို့ ​ဒေသခံ​တွေက​ပြောပါတယ်။

စစ်​ကောင်စီတပ်ဖွဲ့တွေဟာ ဒီဇင်ဘာ ၁၉ ရက်​ကတည်းက ဘန့်​ဘွေး​ရွာမ ​ကျေးရွာမှာ ​ရောက်ရှိ​နေတာဖြစ်ပြီး တပ်စွဲထားတာ ၅ ရက်တိုင်တိုင်ရှိလာခဲ့ပြီလို့ ဆိုပါတယ်။

စစ်​ကောင်စီတပ်ဖွဲ့​တွေ ရှိ​နေတာ​ကြောင့် ဘန့်​​ဘွေး​ရွာမ ​ကျေးရွာအပါအဝင် ထန်းဇင်​ကျေးရွာ၊ လက်ပန်ကျေးရွာနဲ့ ကံစု​ကျေးရွာတွေက ​ဒေသခံပြည်သူ​​တွေဟာ ​နေအိမ်​တွေမှာမ​နေရဲကြဘဲ ထွက်​ပြေးတိမ်း​ရှောင်​နေကြရတယ်လို့ သိရပါတယ်။ 

စစ်​ကောင်စီအဖွဲ့တပ်စွဲထားတဲ့ ဘန့်​ဘွေးရွာမ ​ကျေးရွာဟာ မုံရွာ-ယာကြီး-က​လေးဝ လမ်းပိုင်း​ဘေးမှာတည်ရှိတာဖြစ်ပြီး အချိန်မ​ရွေးပစ်ခတ်မှုရှိလာနိုင်တာ​ကြောင့် ခရီးသွားပြည်သူ ​တွေအ​နေနဲ့ အဲဒီလမ်းပိုင်းကို ဖြတ်သန်းသွားလာခြင်းမပြုလုပ်ကြဖို့ကိုလည်း PDF ပူး​ပေါင်းအဖွဲ့ ​တွေက ​အသိ​ပေးထားပါတယ်။

ဒီဇင်ဘာ ၂၂ ရက်​ကလည်း ယင်းမာပင်မြို့နယ်အတွင်းမှာ နယ်​မြေရှင်းလင်း​ရေးအ​ကြောင်းပြ လှည့်လည်​နေတဲ့ စစ်​ကောင်စီတပ်ဖွဲ့နဲ့ ​​ဒေသခံ PDF ပူး​ပေါင်းအဖွဲ့တို့ ထိ​တွေ့ တိုက်ပွဲ ဖြစ်ပွားခဲ့တာကြောင့် ​ဒေသခံပြည်သူ ​သောင်းချီထွက်​ပြေးကြခဲ့ရသလို စစ်​ကောင်စီတပ်ရဲ့ လက်နက်ကြီးနဲ့ ပစ်ခတ်တာကြောင့် ၆၀ ဝန်းကျင်အရွယ် အမျိုးသမီး ၁ ဦး ​သေဆုံးခဲ့တယ်လို့ ဒေသခံတွေက‌ ပြောပါတယ်။

ဒီနေ့ ညနေပိုင်းအထိ တိုက်ပွဲဆက်လက်ဖြစ်ပွားနေပြီး နှစ်ဖက်ထိခိုက်ဒဏ်ရာရမှုအခြေအနေကိုတော့ မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်