အင်္ဂလန် ကျေးလက်ဒေသကျောင်းမှာ တက်နေတဲ့ မင်းသား ဟယ်ရီရဲ့ ကလေးငယ်တွေကို ဥရောပ ပါပါရာဇီတချို့က နောက်ယောင်ခံ လိုက်နေကြပြီး အဲဒီလိုလုပ်ရပ်ဟာ မိသားစုရဲ့ ပုဂ္ဂလိက လွတ်လပ်ခွင့်ကို အလွန်အမင်းတာဝန်မဲ့စွာ ချိုးဖောက်မှုဖြစ်ကြောင်း စက်တင်ဘာ ၃၀ ရက်မှာ ဟယ်ရီရဲ့ ပြောရေးဆိုခွင့်ရှိသူက ပြောပါတယ်။

အခုဖြစ်ရပ်ဟာ ပြီးခဲ့တဲ့လက အမေရိကန်ပြည်ထောင်စု ကယ်လီဖိုးနီးယားကနေ ဇနီး မီဂန်မာကယ်နဲ့ သားတော် အာချီ (၇ နှစ်)၊ သမီးတော် လီလီဘက် (၅ နှစ်) တို့နဲ့အတူ ဗြိတိန်ကို ပြန်ပြောင်းလာတဲ့ ဘုရင် ချားလ်စ်ရဲ့ အငယ်ဆုံးသားတော် ဟယ်ရီအတွက် နောက်ဆုံးပေါ်လာတဲ့ လုံခြုံရေးပြဿနာတရပ် ဖြစ်ပါတယ်။

မိသားစုက နေအိမ်နဲ့ ကျောင်းကို လျှို့ဝှက်ထားခဲ့ပေမဲ့ ကျောင်းသွားလမ်းမှာ ယာဉ်ကြောပိတ်ဆို့မှုများလို့ လုံခြုံရေးစိုးရိမ်ချက်ကြောင့် ကျောင်းတကြိမ် ပြောင်းခဲ့ရဖူးပါတယ်။

ဓာတ်ပုံဆရာတွေဟာ ကျောင်းအသစ်ရဲ့ ပတ်လည်ကို လမ်းလျှောက်သွားပြီး ကျောင်းဝင်းထဲ ချောင်းမြောင်းကာ ကလေးတွေကို စောင့်ကြည့်ခဲ့ကြကြောင်း၊ ကျောင်းပတ်ဝန်းကျင်မှာ အခုလိုလုပ်ဖို့ ဆုံးဖြတ်တာဟာ အလွန်အမင်း တာဝန်မဲ့လွန်းကြောင်း ပြောရေးဆိုခွင့်ရှိသူက ဆိုပါတယ်။

ဗြိတိန်သတင်းစာတွေက ကိုယ်ရေးလွတ်လပ်ခွင့်ကို ယေဘုယျ လေးစားပေးကြပေမဲ့ “ဥရောပ ပါပါရာဇီတချို့က ကျောင်းမှာရှိတဲ့ ကလေးတွေရဲ့ လွတ်လပ်ခွင့်ကို လေးစားဖို့ ဆန္ဒရှိပုံမပေါ်ဘူး” လို့လည်း ထပ်လောင်းပြောပါတယ်။

အသက် ၄၂ နှစ်အရွယ် ဟယ်ရီဟာ ၁၉၉၇ ခုနှစ်က ပါပါရာဇီတွေကို ရှောင်ရင်း ယာဉ်မတော်တဆမှုနဲ့ ကွယ်လွန်ခဲ့ရတဲ့ မိခင် မင်းသမီး ဒိုင်ယာနာရဲ့ သေဆုံးမှုအတွက် သတင်းစာတွေကို အမြဲအပြစ်တင်ခဲ့သူဖြစ်ပြီး ဇနီးဖြစ်သူအပေါ် သတင်းစာတွေရဲ့ ဆက်ဆံပုံကိုလည်း မိခင်ဖြစ်သူနဲ့ နှိုင်းယှဉ်ကာ မိသားစုလွတ်လပ်ခွင့်ကို အပြင်းအထန် ကာကွယ်တတ်ပါတယ်။

၂၀၂၀ မှာ တော်ဝင်တာဝန်ကနေ နုတ်ထွက်ပြီး သာမန်နိုင်ငံသားတွေအဖြစ် နေထိုင်နေတဲ့ ဟယ်ရီ-မက်ဂန် စုံတွဲမှာ ကိုယ်ပိုင်လုံခြုံရေးအဖွဲ့ ရှိပေမဲ့ တခြား အဆင့်မြင့်တော်ဝင်တွေနည်းတူ ဗြိတိန်အစိုးရဆီကနေ ရဲတပ်ဖွဲ့ရဲ့ အလိုအလျောက် လုံခြုံရေးအစောင့်အရှောက်ကို ရရှိချင်နေကြပါတယ်။

ဟယ်ရီရဲ့ အစ်ကိုဖြစ်သူ နန်းမွေခံ မင်းသား ဝီလျံလည်း ဥရောပ ပါပါရာဇီတွေနဲ့ အလားတူ ကြုံဖူးပြီး တော်ဝင်တာဝန်မဟုတ်ချိန် မိသားစုဓာတ်ပုံတွေကို ဖော်ပြတဲ့ ပြင်သစ်မဂ္ဂဇင်းတွေကို ကိုယ်ရေးလွတ်လပ်ခွင့်အမှုနဲ့ တရားစွဲ အနိုင်ရဖူးပါတယ်။

တချိန်က ရင်းနှီးတဲ့ ညီအစ်ကိုနှစ်ယောက်ဟာ ဟယ်ရီ နန်းတွင်းတာဝန်တွေကို စွန့်လွှတ်ပြီးနောက် ဆက်ဆံရေးပျက်ပြားကြောင်း စာအုပ်ထုတ်ဝေကာ တော်ဝင်မိသားစုကို ဝေဖန်တဲ့ အင်တာဗျူးတွေ ပေးခဲ့တာကြောင့် အခုတော့ အဆက်အသွယ် ပြတ်တောက်နေကြပါတယ်။

Source: Reuters