စစ်ကိုင်းတိုင်း ဆာလင်းကြီးမြို့ လဝကရုံးနားမှာ အောက်တိုဘာ ၂၈ ရက် မနက် ၉ နာရီလောက်က ဗုံးပေါက်ကွဲခဲ့တယ်လို့ ဒေသခံပြည်သူတွေဆီက သိရပါတယ်။
“ဒီနေ့မနက်ခင်းက ကျနော်တို့ ဆားလင်းကြီး လဝကရုံးဗုံးပေါက်ကွဲခဲ့တယ်ဗျ။ အရပ်သားနှစ်ဦး ထိခိုက်တာတွေတော့ ရှိတယ်။ အသက်သေလား။ မသေလားတော့ မသိရဘူး” လို့ ဒေသခံ ပြည်သူ တစ်ဦးက ပြောပါတယ်။
အခုလို ဗုံးထောင်ဖောက်ခွဲခဲ့တာဟာ ဘယ်အဖွဲ့အစည်းက ပြုလုပ်ခဲ့တယ်ဆိုတာကိုတော့ DVB အနေနဲ့ သီးခြားအတည်ပြုချက် မရရှိသေးပါဘူး။
အလားတူ ဘုတလင်မြို့နယ် မုံရွာ-ဘုတလင်သွားကားလမ်းမပေါ်မှာ ဒီနေ့မနက်ပိုင်းက စစ်ကောင်စီယာဉ်ကို ၉ နာရီခွဲနဲ့ ၁၀ နာရီလောက်မှာ မိုင်း နှစ်ကြိမ်ဖောက်ခွဲခဲ့တယ်လို့ ဘုတလင် ပြည်သူ့ကာကွယ်ရေးအဖွဲ့ခေါင်းဆောင်တဦးက ပြောပါတယ်။
“ကျနော်တို့ အဲဒီစစ်ကောင်စီကားကို ပိုးကုန်းကျေးရွာနီးမှာ တစ်ကြိမ်၊ အခုကံသစ်ကျေးရွာအနီးမှာ တစ်ကြိမ် စုစုပေါင်းနှစ်ကြိမ် မိုင်းဆွဲခဲ့တယ်ဗျ။ ပထမမိုင်းဆွဲတုန်းက ၄ ယောက်ကျတယ်။ ဒုတိယအကြိမ်မှာ ၁၂ ယောက် ကျတယ်လို့ ကျနော်တို့သတင်းရတယ်။ ပထမမိုင်းမိတုန်းက ကားပြန်မောင်းလို့ ရသေးတော့ ဒီကောင်တွေ ထပ်ထွက်လာတယ်။ ကျနော့်တို့လည်း ထပ်ချလိုက်တာ ဒုတိယအကြိမ်မှာတော့ ကားလေပေါ်မြှောက်တက်သွာပြီး ပြန်အကျမှာ ကားပက်လက်လန်သွားတယ်။”
မိုင်း ၂ ကြိမ်ခွဲခံရတာကြောင့် စစ်ကောင်စီတပ်ဘက်က ဘုတင်မြို့မှာ 4-wheel အိမ်စီးကားနဲ့ အပြည့် စစ်ကူလာတာရှိသလို မုံရွာမြို့ဘက်ကလည်း စစ်ကားအကြီးနဲ့ အင်အား အပြည့်စစ်ကူလာ တာတွေရှိနေတယ်လို့ ဒေသခံတွေက ပြောပါတယ်။
မိုင်းဆွဲခံရတာကြောင့် ကျဆုံးအလောင်းတွေကို စစ်ကောင်စီက မုံရွာဘက်သယ်ဆောင်သွားကြကာ လက်ရှိအချိန်မှာ မိုင်းအဆွဲခံရတဲ့နေရာမှာ အင်အားအပြည့် တပ်ချလုံခြုံရေးစစ်ဆေးမှုတွေ အပြင်းအထန်လုပ်နေတယ်လို့ ဒေသခံရွာသားတွေဆီက သိရပါတယ်။
ဆားလင်းကြီးမြို့ ဗုံးပေါက်ကွဲမှုနဲ့ ယာဉ်နှစ်ကြိမ် မိုင်းဆွဲခံရမှုကြောင့် သေဆုံးဒဏ်ရာရမှုအခြေအနေနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။
