ပွင့်ဖြူ ဒေသခံပြည်သူ ၃ ယောက်ကို အကြမ်းဖက်စစ်အုပ်စုက ဖမ်းဆီး
DVB
·
September 15, 2021
မကွေးတိုင်းဒေသကြီး၊ ပွင့်ဖြူမြို့နယ်မှာ စက်တင်ဘာလ ၁၄ ရက်နေ့က ပြည်သူ ၃ ယောက်ကို အကြမ်းဖက်စစ်အုပ်စုက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။
NUG အစိုးရနဲ့ အဆက်သွယ်ရှိတယ်ဆိုပြီး ဒလန်တွေက မဟုတ်မမှန်သတင်းပေးတာကြောင့် မနေ့က မနက် ၃ နာရီလောက်မှာ ကျောင်းကုန်းကြီးကျေးရွာက ဦးအောင်ကြည်နဲ့ ကိုနိုင်လင်းတို့ ကို စစ်ကောင်စီက ဖမ်းဆီးသွားတာဖြစ်တယ်လို့ ဒေသခံတစ်ယောက်က ဒီဗွီဘီကို ပြောပါတယ်။
ဒါ့အပြင် မွန်းလွဲ ၂ နာရီခွဲလောက်မှာ ပွင့်ဖြူမြို့နယ် ကုန်းဇောင်းမြို့ သူဌေးတန်းအရှေ့ပိုင်းက ကိုကျော်မြင့်သိန်းကိုလည်း အကြမ်းဖက်စစ်အုပ်စုတွေက လာရောက်ဖမ်းဆီးသွားပြီးတော့ မြို့ထဲမှာလည်း မွှေနှောက်စုံစမ်းနေပါတယ်။
ပွင့်ဖြူမြို့နယ်ထဲမှာ ဒလန်တွေက မမှန်သတင်းပေးတာကြောင့် NLD ပါတီဝင်တွေနဲ့ ပါတီထောက်ခံဝန်းရံကြတဲ့ ပြည်သူတွေ မကြာခဏ ဖမ်းဆီးခံနေကြရတယ်လို့ ဒေသခံတွေဆီကနေ သိရပါတယ်။
