မကွေးတိုင်း၊ နတ်မောက်မြို့နယ်၊ အမှိုက်ပင်ကျေးရွာက ဒေသခံပြည်သူ ၅ ဦးကို စက်တင်ဘာလ ၁၃ ရက် ည ၉ နာရီဝန်းကျင်မှာ အကြမ်းဖက်စစ်ကောင်စီတပ်တွေက ဖမ်းဆီးသွားတယ်လို့ သိရပါတယ်။
ဖမ်းဆီးခံရသူတွေဟာ နတ်မောက်မြို့နယ်၊ အမှိုက်ပင်ကျေးရွာမှာနေထိုင်တဲ့ အမျိုးသား ၄ ဦးနဲ့ အမျိုးသမီး ၁ ဦးတို့ဖြစ်ပြီး ကျေးရွာကနေအိမ် တစ်အိမ်ကိုလည်း ဝင်ရောက်ရှာဖွေသွားကြတယ်လို့ ဒေသခံတွေ ပြောပါတယ်။
ဒေသခံတဦးက "ညကြီးဗျာ။ စစ်ကားတွေနဲ့ တဝုန်းဝုန်းရောက်လာကြတယ်။ ရွာက ဦးမျိုးချစ် ရဲ့အိမ်ကို ဝင်မွှေနှောက်ရှာဖွေပြီး အတွင်းကပစ္စည်းတွေ ဖျက်ဆီးသွားတယ်။ ဒီမနက်မှသိရတာကတော့ သားမျှားရွာက ဒလန်ရဲ့ မဟုတ်မမှန် သတင်းပေးတာလို့သိရတယ်” လို့ ပြောပါတယ်။
ပြီးခဲ့တဲ့ စက်တင်ဘာလဆန်းပိုင်းကလည်း နတ်မောက်မြို့နယ်၊ စိုင်ကောင်းကျေးရွာမှာ ပရဟိတလုပ်ဆောင်နေတဲ့ ရဟန်း ၁ ပါးနဲ့ ပြည်သူ ၃ ဦးကို အကြမ်းဖက်စစ်ကောင်စီက ဖမ်းဆီးသွားပါသေးတယ်။
