ကိုဗစ်အကြောင်းပြကာ ရန်ကုန်-ပဲခူးခရီးသည်တင်ယာဉ် ယာဉ်စီးခကို ၁၀၀၀ ကျပ်မှ ၃၀၀၀ ကျပ်အထိ တိုးမြင့်ကောက်ယူခွင့်ပြုလိုက်တယ်လို့ ခရီးသည်တင်ယာဉ်လိုင်းတွေဆီက သိရပါတယ်။
ကိုဗစ်-၁၉ ရောဂါကာကွယ်ထိန်းချုပ်ရေးအတွက် ထိုင်ခုံ ၂ လုံးမှာ ခရီးသည်တစ်ဦးပဲ ထိုင်ရမှာဖြစ်ပြီး ယာဉ်စီးခကိုလည်း သတ်မှတ်နှုန်းအတိုင်းယူဖို့ ပဲခူးတိုင်း အမှတ်(၅) ယာဉ်ကြီးကြပ်ရေးကော်မတီက ယာဉ်ပိုင်ရှင်တွေဆီ စက်တင်ဘာ ၄ ရက်မှာ အသိပေးအ ကြောင်းကြားစာ ပေးပို့ထားတာပါ။
ပြောင်းလဲသတ်မှတ်လိုက်တဲ့ နှုန်းထားအရ ရန်ကုန်-ပဲခူးခရီးစဉ်အတွက် တစ်ဦး ၃၀၀၀ကျပ်၊ ပဲခူး-ညောင်လေးပင်ခရီးစဉ်အတွက် တစ်ဦး ၃၀၀၀ ကျပ်နဲ့ ညောင်လေးပင်-ရန်ကုန်ခရီးစဉ်အတွက် တစ်ဦး ၆၀၀၀ ကျပ်ဖြစ်ပါတယ်။
ယာဉ်လိုင်းတွေအနေနဲ့ သတ်မှတ်ယာဉ်စီးခထက် ပိုမကောက်ဖို့နဲ့ ယာဉ်နောက်လိုက်နဲ့ ခရီးသည်တွေ Mask တပ်ဖို့ကိုလည်း ညွှန်ကြားထားပြီး လိုက်နာမှု မရှိပါက ယာဉ်မောင်းနဲ့ ယာဉ်နောက်လိုက်ကို ထိရောက်စွာ အပြစ်ပေးအရေးယူမယ်လို့ အကြောင်းကြားစာမှာ ဖော်ပြထားပါတယ်။
ဒါ့အပြင် ကိုဗစ်ကာလအတွင်း သတ်မှတ်ယာဉ်စီးခနှုန်းနဲ့ မပြေးဆွဲနိုင်ပါက ယာဉ်ထွက်ခွာပြေးဆွဲခြင်း မလုပ်ဖို့လည်း သတိပေးထားပါတယ်။
ရန်ကုန်-ပဲခူးယာဉ်လိုင်းတွေအနေနဲ့ အခုလိုအကြောင်းကြားစာ မထုတ်ခင်အချိန်ထိ ခရီးသည် တစ်ဦးလျှင် ယာဉ်စီးခ ၁၀၀၀ ကျပ်သာကောက်ခံရမှာဖြစ်ပေမဲ့ ကိုဗစ်ကပ်ရောဂါ ပေါ်ပေါက်ပြီးနောက် အကြောင်းမျိုးမျိုးပြကာ ယာဉ်စီးခ ပိုမိုကောက်ခံနေတာ ကြာပြီလို့ ခရီးသွား တွေဆီက သိရပါတယ်။
အခုလို ထိုင်ခုံနေရာချမှုနဲ့ ယာဉ်စီးခ နှုန်းအသစ်သတ်မှတ်ပေးလိုက်ပေမဲ့ ယာဉ်အများစုဟာ ထိုင်ခုံခြားတာ မလုပ်ဘဲ ခုံပြည့်ခရီးသည်တင်တာတွေ လုပ်နေဆဲလို့ ခရီးသွား တစ်ဦးက ဆိုပါတယ်။
