ပြည်ပပို့ကုန်ကနေရလာတဲ့ နိုင်ငံခြားငွေတွေကို ၄ လအတွင်း ပြန်ရောင်းချရမယ်လို့ စစ်ကောင်စီ ဗဟိုဘဏ်က စက်တင်ဘာ ၃ ရက်နေ့မှာ အမိန့်ထုတ်လိုက်ပါတယ်။
နိုင်ငံခြားသုံးငွေ စီမံခန့်ခွဲမှု ဥပဒေအရ အပ်နှင်းထားတဲ့လုပ်ပိုင်ခွင့်ကို ကျင့်သုံးပြီး ထုတ်ပြန်တာလို့ဆိုပါတယ်။
ပြည်ပကို ပို့ကုန်တင်ပို့သူတွေဟာ ပို့ကုန်ရငွေကို ပို့ကုန်တင်ပို့တဲ့နေ့ကနေ သတ်မှတ်ကာလအတွင်း နိုင်ငံထဲကဘဏ်စာရင်းထဲကို နိုင်ငံခြားသုံးငွေနဲ့ မပျက်မကွက်ထည့်သွင်းရမယ်လို့ ဥပဒေမှာ ပြဋ္ဌာန်း ထားပါတယ်။
ဒါကြောင့် ပို့ကုန်တင်ပို့သူတွေအနေနဲ့ ကိုယ့်ရဲ့ ဘဏ်စာရင်းထဲကို နိုင်ငံခြားသုံးငွေဝင်ရောက်ပြီးတဲ့နောက် မသုံးဘဲကျန်နေတဲ့ ပို့ကုန်ရငွေတွေကို ငွေဝင်ပြီး ၄ လအတွင်း သက်ဆိုင်ရာ နိုင်ငံခြားသုံးနေငွေ ရောင်းဝယ်ဖောက်ကားတဲ့လုပ်ငန်းလုပ်စင်ရ ဘဏ်ကို ဈေးကွက်ပေါက်ဈေးနဲ့ မပျက်မကွက်ရောင်းချရမယ်လို့ ဗဟိုဘဏ် ဥက္ကဌက အမိန့်ထုတ်လိုက်ပါတယ်။
ဒီအမိန့်ဟာ ထုတ်ပြန်လိုက်တဲ့ စက်တင်ဘာ ၃ ရက်နေ့ကစလို့ အကျိုးသက်ရောက်စေရမယ်လို့လည်း ဆိုပါတယ်။
ပြည်ပပို့ကုန်တင်ပို့မှုကနေရတဲ့ ငွေတွေစာရင်းရှင်းလင်းဖို့ ကျန်ရှိနေတဲ့ကုမ္ပဏီပေါင်း ၄၇၀ ကျော်ကို ဒီကနေ့ ၂၀၂၁ ခုနှစ်၊ သြဂုတ်လ ၉ ရက်နေ့မှစပြီး လာမည့် ရက်ပေါင်း ၃၀ အတွင်း စာရင်းရှင်းလင်းပေးကြဖို့လည်း ဗဟိုဘဏ်က အချိန်ထပ်တိုးသတ်မှတ်ကြေညာထားပါတယ်။
စာရင်းရှင်းလင်းဖို့ မူလသတ်မှတ်ထားတဲ့ အချိန်ဟာ ဩဂုတ် ၇ ရက်နေ့ စေ့မှာဖြစ်ပေမဲ့ ကိုဗစ်-၁၉ ရောဂါဖြစ်ပွားနေချိန်နဲ့ ရုံးပိတ်ရက်တွေနဲ့ တိုက်ဆိုင်နေတာကြောင့် နောက်ထပ် တစ်လအချိန်ထပ်တိုးပေးလိုက်တာလို့လည်း ဆိုပါတယ်။
ပြီးခဲ့တဲ့ ၂၀၁၈ ခုနှစ်က ပို့ကုန်တင်ပို့ခဲ့ပြီးနောက် ပို့ကုန်ရငွေအတွက် စာရင်းရှင်းလင်းဖို့ ကုမ္ပဏီပေါင်း ၄၇၇ ခုကျန်ရှိနေတယ်လို့ ဗဟိုဘဏ်ကနေ သိရပါတယ်။
