စစ်အုပ်စုက ပြုလုပ်တဲ့ သုံးပွင့်ဆိုင်ယန္တရားကနေ နုတ်ထွက်ထားပြီး အဲဒီအစည်းအဝေးတွေမှာ CTUM အမည်သုံးစွဲပါက လူပုဂ္ဂိုလ်တစ်ဦးတစ်ယောက်ကိုဖြစ်စေ၊ အဖွဲ့အစည်းတစ်ခုကိုဖြစ်စေ၊ သတင်းမီဒီယာကိုဖြစ်စေ ပြည်တွင်းနဲ့ အပြည်ပြည်ဆိုင်ရာ ဥပဒေတွေနဲ့ အရေးယူသွားမယ်လို့ ထုတ်ပြန်လိုက်ပါတယ်။
စစ်ကောင်စီအနေနဲ့ အလုပ်သမားသမဂ္ဂအဖွဲ့ချုပ်တွေ၊ အလုပ်သမားအရေး လှုပ်ရှားဆောင်ရွက်နေ တဲ့ အဖွဲ့အစည်း ၁၆ ခုကို တရားဝင်ဖွဲ့စည်းထားတာမဟုတ်တဲ့ အဖွဲ့အစည်းတွေအဖြစ် မတ်လ ၂ ရက်က ကြေညာခဲ့တယ်လို့ ဆိုပါတယ်။
ဒါကြောင့် မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် (CTUM)နဲ့ မြန်မာနိုင်ငံစက်မှုလက်မှုနဲ့ ဝန်ဆောင်မူလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) တို့ကလည်း အစိုးရ၊ အလုပ်ရှင်၊ အလုပ်သမား သုံးပွင့်ဆိုင်ယန္တရားမှာ ဆက်လက်ပါဝင်တော့မှာ မဟုတ်ဘူးလို့ ပြန်လည်ထုတ်ပြန်ခဲ့ပါတယ်။
အဲဒီလို သုံးပွင့်ဆိုင်ယန္တရားက နုတ်ထွက်ထားတာကြောင့် သုံးပွင့်ဆိုင်ယန္တရားမှာ ပါဝင်ဆောင်ရွက်ဖို့ ဘယ်အဖွဲ့ဝင်ကိုမှ တာဝန်ပေးထားတာမရှိသလို စစ်အုပ်စုက လုပ်မယ့်အစည်းအဝေးတွေမှာ CTUM အမည်သုံးစွဲခွင့်မရှိကြောင်း ဒီနေ့ထုတ်ပြန်လိုက်တာပါ။
ဒါ့အပြင် ပြည်ထောင်စုသမ္မတနိုင်ငံ ကုန်သည်များနှင့်စက်မူလက်မူလုပ်ငန်းရှင်များအသင်းချုပ် (UMFCCI) အနေနဲ့ CTUM နဲ့ MICS-TUsF တို့ အမည်အလွဲသုံးစားလုပ်ပြီး အစည်းအဝေး တက်ရောက်ဆက်သွယ်လာတာကို အသိအမှတ်မပြုဖို့လည်း သတိပေးထားပါတယ်။
CTUM အနေနဲ့ စက်တင်ဘာလမှာပြုလုပ်မယ့် ကမ္ဘာ့ကုလသမဂ္ဂညီလာခံမှာ စစ်အုပ်ကို နိုင်ငံကိုယ်စားပြုမရရှိအောင် အပြည်ပြည်ဆိုင်ရာအလုပ်သမားသမဂ္ဂတွေနဲ့ ချိတ်ဆက်ပြီး အစွမ်းကုန်ကြိုးစားနေတယ်လို့ ထည့်သွင်းဖော်ပြထားပါတယ်။
