ထိုင်းနိုင်ငံ၊ ဘန်ကောက် ပရဝေ့နယ်မြေထဲမှာ တရားမဝင် ဖွင့်လှစ်ထားတဲ့ အင်တာနေရှင်နယ်လ် စာသင်ကျောင်းတကျောင်းကို တာဝန်ရှိသူတွေက ဧပြီ ၁ ရက်က ဝင်ရောက်စစ်ဆေးပြီး တရားမဝင် စာသင်နေတဲ့ နိုင်ငံခြားသား ဆရာ/ဆရာမ ၁၀ ယောက်ကို ဖမ်းဆီးလိုက်တယ်လို့ ထိုင်းသတင်း တွေမှာ ဖော်ပြပါတယ်။ 

 ဒီမတိုင်ခင်ရှေ့က ပရဝေ့နယ်မြေ ပရဝေ့လမ်းထဲမှာ နိုင်ငံခြားသားတွေ တရားမဝင်စာ သင်ကျောင်း ဖွင့်လှစ်နေကြောင်း သတင်းပေးပို့ချက်ရတာကြောင့် နယ်မြေခံရဲတပ်ဖွဲ့၊ အုပ်ချုပ်ရေးရုံးနဲ့ အလုပ်သမားရုံးက တာဝန်ရှိသူတွေနဲ့ဆက်သွယ်ပြီး ဧပြီ ၁ ရက် မွန်းလွဲ ၁ နာရီက သွားရောက် စစ်ဆေးခဲ့တယ်လို့ အမှတ် (၁) တိုင်းဒေသလူဝင်မှုကြီးကြပ်ရေး ရဲတပ်ဖွဲ့  ရဲမှူးချုပ် ပရဆဒ် ခေမပရဆစ်က  သတင်းထောက်တွေကို ပြောပါတယ်။ 

စစ်ဆေးချက်အရ အဆိုပါစာသင်ကျောင်းမှာ ဖွင့်ထားတာ တနှစ်ကျော်ပြီဖြစ်ပြီး ကျောင်းဖွင့်ခွင့် မှတ်ပုံတင်ထားခြင်း မရှိဘူး၊ ကျောင်းသားပေါင်း ၁၀၀ ကျော်ရှိတယ်၊ မူကြိုနဲ့ မူလတန်း ကလေး တွေ ဖြစ်တယ်၊ ဆရာ/ဆရာမတွေကလည်း အိန္ဒိယ၊ ဘင်္ဂလားဒေ့ရှ်၊ နိုင်ဂျီးရီးယား စတဲ့ နိုင်ငံသား တွေဖြစ်ပြီး အလုပ်သမားမှတ်ပုံတင်မရှိဘူး၊ စုစုပေါင်း ၁၀ ယောက်ရှိတယ်၊  ဒါကြောင့် အဆိုပါ ဆရာ/ဆရာမတွေကိုလည်း ခွင့်ပြုချက်မရှိဘဲ အလုပ်ဝင်ရောက်လုပ်ကိုင်မှုနဲ့ အရေးယူသွားမယ်လို့ ဆိုပါတယ်။ 

ထိုင်းနိုင်ငံမှာ စာသင်ကျောင်းဖွင့်လိုက ထိုင်းနိုင်ငံရဲ့ ပြဋ္ဌာန်းထားတဲ့ ဥပဒေအတိုင်း အဆင့်ဆင့် အတိအကျ လိုက်နာဆောင်ရွက်ရမှာဖြစ်တယ်၊ ဆရာတွေဟာလည်း  နေထိုင်ခွင့်ဗီဇ၊ အလုပ်လုပ်ခွင့် လက်မှတ် (ဝေါ့ခ်ပါမစ်) စတာတွေ ပြည့်ပြည့်စုံစုံရှိရမှာဖြစ်တယ်။ 

ကျောင်းသားမိဘအုပ်ထိန်းသူတွေအနေနဲ့လည်း မိမိကလေးကို ကျောင်းအပ်မယ်ဆိုရင် အဲဒီ ကျောင်းက တရားဝင်/မဝင်ဆိုတာကို သေချာစုံစမ်းပြီးမှ အပ်နှံပါ။ အခုလိုပြဿနာဖြစ်လာရင် သက်ဆိုင်ရာက ကျောင်းကို ချက်ချင်းပိတ်သိမ်းနိုင်ပြီး ကျောင်းသားတွေအတွက်ရော မိဘအုပ်ထိန်းသူတွေအတွက်ပါ နှစ်ဘက်လုံး ထိခိုက်နစ်နာတယ်။ 

ပြည်သူတွေအနေနဲ့ ထိုင်းနိုင်ငံထဲမှာ နိုင်ငံခြားသားတွေ တရားမဝင်ပြုမူလုပ်ကိုင်နေတာကို တွေ့ရှိက ထိုင်းအမျိုးသားရဲတပ်ဖွဲ့ အရေးပေါ်ဖုန်းလိုင်း ၁၅၉၉ ဒါမှမဟုတ် လူဝင်မှုကြီးကြပ်ရေးရဲတပ်ဖွဲ့  အရေးပေါ်ဖုန်းလိုင်း ၁၁၇၈ သို့ ဆက်သွယ်သတင်းပေးဖို့ ရဲမှူးချုပ်က တိုက်တွန်းသွားပါတယ်။ 

Source - matichon /Bright TV