စစ်ကိုင်းတိုင်း၊ ဘုတလင်မြို့၊ မြို့နယ်စည်ပင်သာယာရေးအဖွဲ့က စည်းကြပ်ခွန် ဖြတ်ပိုင်းတွေ ကိုင်ဆောင်ပြီး ရပ်ကွက်နေအိမ်တွေမှာ ဩဂုတ် ၁၄ ရက်နေ့က ခြိမ်းခြောက်ငွေကောက်ခံနေတယ်လို့ မြို့ခံတွေက ပြောပါတယ်။
မြို့ခံတဦးက “ကျနော်တို့ရပ်ကွက်ထဲက အိမ်တွေကို အဆောက်အုံအခွန်နဲ့ ဝင်းမြေခွန်ဆိုပြီး လာကောက်တယ်။ အခွန်မဆောင်ရင် စည်ပင်သာယာဥပဒေနဲ့ တရားစွဲမယ်။ ပုဒ်မက ဘယ်လောက်၊ ဘယ်ရွေ့ရှိတယ်။ ထောင်ဘယ်နှနှစ် ကျနိုင်တယ်၊ အဲလိုတွေပြောပြီး အခွန်အတင်းအကျပ်ဆောင်ခိုင်းတယ်ဗျ။”
ကိုဗစ်-၁၉ ကြောင့် တနိုင်ငံလုံးက ပြည်သူတွေ အခက်အခဲ ဖြစ်နေချိန်မှာ အခုလို အတင်းအကျပ် ငွေကောက်နေတာ ဓားပြတိုက်သလို ဖြစ်နေတယ်လို့ ဆိုပါတယ်။
“ကျနော်တို့မြို့နယ်မှ မဟုတ်ဘူးလေ၊ မြန်မာတနိုင်ငံလုံး ကိုဗစ်-၁၉ ရောဂါဖြစ်နေလို့ လူတွေ ထမင်းတောင်နပ်မမှန်တဲ့အချိန်ဗျာ၊ ဒီအခွန်မဆောင်ရင် ဖမ်းမယ်၊ ဆီးမယ်ဆိုတော့ တရားမလွန်ဘူးလားဗျာ။ အခွန်ဆောင်ရမဲ့ငွေ Amount က မများဘူးဆိုပေမဲ့ ဒီအချိန် ဘာမှ အလုပ်အကိုင်မရှိတဲ့အချိန် ဓားပြတိုက်သလို ပြည်သူကို အခွန်တောင်းနေတာ ကြားလို့မှ ကောင်းသေးလားဗျာ။ ကျနော်ကတော့ ပိုက်ဆံမရှိတော့ မဆောင်လိုက်ဘူး။” လို့ မြို့ခံက ပြောပါတယ်။
မြို့နယ်အတွင်းမှာ စည်ပင်အခွန်ကောက်ခံတာကို ကြောက်လို့ ဆောင်လိုက်သူတွေရှိသလို အချို့ကလည်း စီပွားရေးမပြေလည်လို့ မဆောင်သူတွေလည်း ရှိနေပြီး အများစုကတော့ အမျိုးသားညီညွတ်ရေးအစိုးရ (NUG) က ထုတ်ပြန်ထားတဲ့ ဥပဒေအတိုင်း စစ်ကောင်စီကို အားပေးအားမြှောက်ဖြစ်စေမဲ့ အခွန်ဆောင်တာတွေ မလုပ်ကြဘူးလို့ မြို့ခံတွေက ပြောပါတယ်။
အခွန်ငွေ ၁၅ ရက်အတွင်း မပေးဆောင်တဲ့သူတွေကို စစ်ကိုင်းတိုင်း စည်ပင်သာယာရေးဥပဒေ ပုဒ်မ ၁၇၇ အရ ကျင့်သုံးဆောင်ရွက်သွားမယ်လို့ အခွန်ပြေစာမှာ ဖော်ပြထားပါတယ်။
