မလေးရှားနိုင်ငံမှာ ကိုဗစ်-၁၉ ရောဂါ ကူးစက်ပျံ့နှံ့မှုတွေ လျော့ကျမလာဘဲ မြင့် တက်နေတာကြောင့် မူလသတ်မှတ်ထားတဲ့ ကာလကနေ ရက်အကန့်အသတ်မရှိ လော့ခ် ဒေါင်းကာလ တိုးမြှင့်ချမှတ်လိုက်ပါတယ်။

အရင်က လော့ခ်ဒေါင်းကာလ ၂ ပတ်ချမှတ်မှုဟာ ဇွန် ၂၈ ရက်နေ့ ပြည့်မြောက်မှာ ဖြစ်ပေမယ့် မလေးရှားနိုင်ငံမှာ နေ့စဉ် ကိုဗစ်-၁၉ ရောဂါကူးစက်မှုအသစ်ကတော့ ၅,၀၀၀ ကျော်ကနေ လျော့နည်းသွားတာမျိုးမရှိဘဲ ဆက်လက်မြင့်တက်နေတာကြောင့် ခုလိုတိုး မြှင့်လော့ခ်ဒေါင်း ချမှတ်လိုက်တာလို့ ကာကွယ်ရေးဝန်ကြီး အစ္စမေးလ် ဆာဘရီ ယာကော့ဘ်က ပြောပါတယ်။

ကိုဗစ်-၁၉ အထူးကြပ်မတ်ကုသဆောင်တွေမှာလည်း ကုသမှုခံယူနေသူတွေ ပြည့်လုနီးပါး ဖြစ်နေပြီး မလေးရှားလူဦးရေရဲ့ ၆ ဒသမ ၄ ရာခိုင်နှုန်းသာ ကိုဗစ်-၁၉ ကာကွယ် ဆေး ၂ ကြိမ်ထိုးရသေးတယ်လို့ ဆိုပါတယ်။

အစိုးရကတော့ အပတ်စဉ် ကိုဗစ်-၁၉ ကူးစက်မှုနှုန်း ပျမ်းမျှ ၄,၀၀၀ ထိ ကျဆင်းလာပြီး တခြားသော ရောဂါကူးစက်နိုင်တဲ့ အခြေအနေတွေ ရှင်းလင်းမှသာ လော့ခ်ဒေါင်းဖြေလျှော့မှု လုပ်နိုင်မယ်လို့ ဆိုပါတယ်။

လော့ခ်ဒေါင်းကာလအတွင်းမှာတော့ မရှိမဖြစ် ထုတ်လုပ်မှုနဲ့ ဝန်ဆောင်မှုကဏ္ဍတွေကိုသာ ဖွင့်လှစ်ခွင့်ပြုထားပြီး ဈေးဝယ်စင်တာတွေ၊ ကျောင်းတွေ၊ အများပြည်သူနဲ့ ဆိုင်တဲ့ ပန်းခြံတွေကိုတော့ ပိတ်ထားမှာ ဖြစ်ပါတယ်။

ဒါ့အပြင် ပြည်သူတွေကိုလည်း သွားလာမှုတွေ ကန့်သတ်ထားပြီး တအိမ်ကို လူ ၂ ယောက်သာ အပြင်ထွက်ခွင့်ပြုမှာဖြစ်ကာ ပြည်နယ်၊ ခရိုင်တခုနဲ့တခုကြား ခရီးသွားလာခွင့်တွေကိုလည်း တားမြစ်ထားပါတယ်။

မလေးရှားနိုင်ငံတဝန်း လတ်တလောအချိန်ထိ ကိုဗစ်-၁၉ ရောဂါကူးစက်ခံရသူဦးရေ ၇ သိန်းကျော်နဲ့ သေဆုံးသူ ၅,၀၀၀ ကျော် ရှိနေပြီဖြစ်ကာ အာဆီယံနိုင်ငံတွေထဲ ကူးစက်မှုအမြင့်ဆုံး ၃ နိုင်ငံထဲမှာ ပါဝင်နေပါတယ်။

တကမ္ဘာလုံးအတိုင်းအတာနဲ့ ရောဂါကူးစက်ခံရသူပေါင်း ၁၈၂ သန်းကျော်၊ သေဆုံးသူ ၃ ဒသမ ၉ သန်းကျော်နဲ့ ရောဂါပြန်လည်ပျောက်ကင်းလာသူ အရေအတွက် က တော့ ၁၆၆ ဒသမ ၅ သန်းကျော် ရှိပါတယ်။