ချင်းပြည်နယ်၊ ထန်တလန်မြို့နယ်မှာ နေထိုင်ကြတဲ့ ပြည်သူတွေအနေနဲ့ အကြမ်း ဖက်စစ်ကောင်စီတပ်နဲ့ ပတ်သက်ခြင်းမပြုလုပ်ကြဖို့နဲ့ ပတ်သက်ကြောင်း သက်သေတွေ့ရှိပါက အသက်အန္တရာယ်စိုးရိမ်နိုင်ဖွယ်ရှိကြောင်း ချင်းပြည်နယ်ကာကွယ်ရေးတပ်က သတိပေးလိုက်ပါတယ်။

ချင်းပြည်နယ်ကာကွယ်ရေးတပ်(CDF) ရဲ့ ထုတ်ပြန်ချက်ထဲမှာတော့ ထန် တလန်မြို့တွင်းမြို့ပြင် မော်တော်ယာဉ်ပိုင်ရှင်တွေအနေနဲ့ မိမိတို့ယာဉ်အဝင်အထွက် သ တင်းတွေကို CDF-ထန်တလန် တာဝန်ရှိသူတွေကို အကြောင်းကြားဖို့၊ ည ၉ နာရီနောက်ပိုင်း ဘယ်ယာဉ်၊ လူပုဂ္ဂိုလ်မဆို မြို့တွင်းမြို့ပြင် သွားလာခြင်းမပြုကြဖို့ သတိပေးထားတာပါ။

ဒါ့အပြင် မြို့စွန်မြို့ဖျားနေရာတွေမှာ အုပ်စုလိုက် အရက်သောက်တာ၊ လမ်းပေါ် ထွက်အော်ဟစ်တာ စတဲ့ ပြည်သူတွေအတွက် နှောင့်ယှက်တာတွေ မပြုလုပ်ကြဖို့နဲ့ ကောလာဟလသတင်းအမှားတွေ မဖြန့်ကြဖို့လည်း သတိပေးထားပြီး လိုက်နာခြင်းမရှိတဲ့ ဘယ်သူ့ကိုမဆို CDF-ထန်တလန်က အရေးယူဆောင်ရွက်မှုတွေ လုပ်ဆောင်သွားမယ်လို့ ဆိုပါတယ်။

ထန်တလန်ပြည်သူတွေအနေနဲ့ အကြမ်းဖက်စစ်ကောင်စီတပ်နဲ့ လုံးဝပတ်သက်မှု မပြုလုပ်ကြဖို့၊ အထူးသဖြင့် နယ်ဝေးကလာတဲ့ ထန်တလန်မြို့နယ်တွင်း အလုပ်သမားတွေ၊ ကုမ္ပဏီအလုပ်သမားတွေ၊ အအေး၊ ရေခဲချောင်းရောင်းသူတွေ၊ အသေးစားဆိုင်ကယ် ကုန်သည်တွေအနေနဲ့ အကြမ်းဖက်စစ်ကောင်စီတပ်နဲ့ ပတ်သက်မှု မပြုလုပ်ကြဖို့၊ ပတ် သက်မှုသက်သေတွေ့ရှိပါက အသက်အန္တရာယ်အတွက် စိုးရိမ်နိုင်ဖွယ်ရှိကြောင်း သိစေလိုတယ်လို့ ဖော်ပြထားပါတယ်။

ချင်းပြည်နယ်ကာကွယ်ရေးတပ်(CDF)ကိုတော့ ချင်းပြည်နယ်အတွင်းက မြို့နယ် ၉ ခုနဲ့ ပြည်နယ်ပြင်ပက ချင်းအမျိုးသားတွေ စုပေါင်းကာ ပြီးခဲ့တဲ့ ဧပြီလဆန်းပိုင်းမှာ စတင်ဖွဲ့စည်းခဲ့တာပါ။

အာဏာသိမ်း စစ်ကောင်စီတပ်တွေနဲ့ တိုင်းရင်းသားလက်နက်ကိုင်အဖွဲ့တွေကြား တိုက်ပွဲတွေကြောင့် ချင်းပြည်နယ်မှာ ဒေသခံ လူပေါင်း ၁၈,၀၀၀ လောက်ဟာ နေရပ်စွန့် ခွာထွက်ပြေးတိမ်းရှောင်နေကြရတယ်လို့ ကုလသမဂ္ဂ လူသားချင်းစာနာထောက်ထားမှုဆိုင်ရာ ညှိနှိုင်းဆောင်ရွက်ရေးရုံး (UNOCHA) က ထုတ်ပြန်ထားပါတယ်။

စစ်ဘေးရှောင်ဒေသခံတွေဟာ ချင်းပြည်နယ် မင်းတပ်၊ ကန်ပက်လက်၊ ဟားခါး၊ မတူပီ၊ ထန်တလန်မြို့တွေနဲ့ မကွေးတိုင်း ဆောမြို့က ယာယီစခန်း ၇၄ ခုမှာ နေထိုင်နေကြရကြောင်းနဲ့ သူတို့ဟာ ချင်းပြည်နယ်မှာ မေ ၁၂ ရက်ကတည်းကနဲ့ မကွေးတိုင်းမှာ ဇွန် ၆ ရက်နေ့ကတည်းက နေရပ်ရွှေ့ပြောင်းနေထိုင်ခဲ့ကြရတာလို့ ဆိုပါတယ်။

ဒါ့အပြင် အကြမ်းဖက်မှုတွေကြောင့် မေ ၁၂ ရက်ကတည်းက လူထောင်ပေါင်းများစွာလည်း တောတောင်တွေထဲကို ထွက်ပြေးသွားကြပြီ ဖြစ်ပါတယ်။

ချင်းပြည်နယ် တချို့နေရာတွေက လုံခြုံရေးအခြေအနေတွေဟာ စိုးရိမ်စရာဖြစ်နေပြီး ကန်ပက်လက်၊ မင်းတပ်၊ မတူပီနဲ့ ထန်တလန်မြို့နယ်တွေအပြင် နယ်နိမိတ်ချင်း ဆက်စပ်နေတဲ့ မကွေးတိုင်းက မြို့နယ်တချို့မှာလည်း အကြမ်းဖက်စစ်ကောင်စီတပ်တွေနဲ့ ချင်းပြည်နယ်ပြည်သူ့ကာကွယ်ရေးတပ်ဖွဲ့(CDF)ကြားက တိုက်ပွဲတွေ ပုံမှန်ဖြစ်နေတယ်လို့လည်း UNOCHA က ဆိုပါတယ်။

ဒေသခံမိတ်ဖက်တွေအဆိုအရ တိုက်ပွဲတွေကြောင့် ဇွန် ၁၁ ရက်နေ့မှာ ထန်တလန်မြို့က ခန့်မှန်းခြေလူပေါင်း ၈၂၀ လောက်ဟာ အနီးအနားက တောတောင်တွေဆီကို ထွက်ပြေးတိမ်းရှောင်သွားပြီး သူတို့ဆီ အကူအညီတွေ အမြန်ဆုံးရောက်ရှိဖို့ လိုအပ်နေတယ်လို့ ဆိုပါတယ်။