ကချင်ပြည်နယ်၊ ဝိုင်းမော်မြို့နယ်၊ တန်ဘောင်ကျေးရွာမှာ ဇွန်လ ၁၀ ရက်ညနေပိုင်းက တရုတ်တစ်သျှူးငှက်ပျောတင်တွဲကားတစ်စီး တိမ်းမှောက်သွားပါတယ်။
ညနေ ၅ နာရီကျော် ၆ နာရီလောက်မှာ တန်ဘောင်ကျေးရွာအ၀င်လမ်းအကွေ့ ချောက်မှာ သူ့ဘာသာသူ မှောက်သွားတာဖြစ်တယ်လို့ မျက်မြင် ဒေသခံတွေက ပြောပါတယ်။ ကားမောင်းသမားက အရက်သောက်ထားပုံရတယ်လို့လည်းဆိုပါတယ်။
“ကျနော်ပြန်လာတာ ည ၈ နာရီကျော်လောက်ထိ ကားကလမ်းဘေးမှာ ပက်လက်လန် နေတော့ လန့်သွားတာ။ ပြီးမှ နောက်ကားတစ်စီးကနေ ငှက်ပျောဖာတွေ ပြန်သယ်နေကြတာ တွေ့တယ်။ ဘေးနားမှာတော့ ကားသမားထင်တယ် ခြေထောက်တွေမှာပက်တီးတွေနဲ့ ရဲတွေနဲ့ စကားပြောနေခဲ့တယ်”လို့ ဒေသခံလူငယ်တစ်ဦးက ပြောပါတယ်။
ပြီးကတဲ့မေလ ဒုတိယပတ်ကလည်း ဝိုင်းမော် ဂေါ်ဆက်ယန်ရွာမှာ ငှက်ပျောတွဲကားတစ်စီး လမ်းချော်တိမ်းမှောက်ခဲ့သေးပါတယ်။
ဝိုင်းမော်မြို့နယ်ရှိ တရုတ်-မြန်မာနယ်စပ် ကန်ပိုက်တီဂိတ်ကို ကိုဗစ်ကြောင့် ပိတ်ထားပေမဲ့ ငှက်ပျောကားတွေ အသွားအလာမပျက်ဘဲ ယာဉ်မောင်းနဲ့ ကားလဲပြီး တရုတ်ပြည်ဘက်သို့ ကုန်သွယ်သယ်ယူနေကြဆဲဖြစ်တယ်လို့ ကန်ပိုက်တီမြို့ခံတွေထံကနေသိရပါတယ်။
တရုတ်စီးပွားရေးသမားတွေက ကချင်ပြည်နယ် ဝိုင်းမော်မြို့နယ်မှာ တရုတ်တစ်သျှူးငှက်ပျောကို ဧကသိန်းနဲ့ချီ စိုက်ပျိုးထားတာဖြစ်ပါတယ်။
