စစ်ကိုင်းတိုင်းအတွင်း စစ်အာဏာရှင်အစိုးရက ကြိုတင်အကြောင်းမကြားဘဲ ဆည်ရေတွေ ဖောက်ချမှုကြောင့် ရေဘေးဒုက္ခဆိုးဝါးစွာ ကြုံတွေ့နေရတဲ့ ပြည်သူ ၁ ဒသမ ၂ သန်းကျော်ထံကို ဥရောပသမဂ္ဂ (EU) အနေနဲ့ အကူအညီတွေ တိုက်ရိုက်ပေးအပ်ဖို့ စစ်ကိုင်းတိုင်းဒေသ သပိတ်အင်အားစုနဲ့ မိတ်ဖက်သပိတ်အဖွဲ့ ၄၃ ဖွဲ့က ဩဂုတ် ၂၄ ရက်က အိတ်ဖွင့်ပေးစာပေးပို့ တောင်းဆိုပါတယ်။
စစ်အာဏာရှင်အစိုးရဟာ သဖန်းဆိပ်ဆည်နဲ့ ကာဘိုးဆည်တို့ကနေ ရေတွေကို အသိပေးခြင်းမရှိဘဲ လွှတ်ခဲ့လို့ မြို့နယ် ၁၁ မြို့နယ်မှ သန်းနဲ့ချီတဲ့ပြည်သူတွေ ရေဘေးသင့်ခဲ့ရတဲ့အပြင်၊ ကူညီကယ်ဆယ်ရေး ဆောင်ရွက်သူတွေကို ဖမ်းဆီးတာနဲ့ လေကြောင်းကနေ တိုက်ခိုက်တာတွေ လုပ်နေတယ်လို့ ပေးစာမှာ ထည့်သွင်းဖော်ပြပါတယ်။
ဒါကြောင့် EU က ပံ့ပိုးပေးမဲ့ အကူအညီတွေကို စစ်အာဏာရှင်ထံ မပေးဘဲနဲ့ ဒေသခံ အရပ်ဘက်အဖွဲ့အစည်းတွေ၊ စစ်ကိုင်းဖက်ဒရယ်ယူနစ် ကြားကာလအစိုးရနဲ့ အမျိုးသားညီညွတ်ရေးအစိုးရ (NUG) တို့နဲ့ ပူးပေါင်းကာ နယ်စပ်အခြေပြု လမ်းကြောင်းတွေကတဆင့် ပြည်သူတွေထံ တိုက်ရိုက်ပေးပို့ပေးဖို့ တိုက်တွန်းတောင်းဆိုခဲ့ပါတယ်။
