လူထုခေါင်းဆောင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းမာစွာနဲ့ သက်ရှိထင်ရှား ရှိနေသေးကြောင်း ခိုင်မာတဲ့ သက်သေပြဖို့ စစ်အာဏာရှင်ကို တောင်းဆိုတဲ့ PROOF OF LIFE လှုပ်ရှားမှု ရက်ပေါင်း ၇၀ ပြည့်သွားပေမဲ့ စစ်အာဏာရှင်ဘက်က သက်သေမပြနိုင်ဘဲ နှုတ်ဆိတ်နေဆဲဖြစ်တယ်လို့ All In One Piece Movement အဖွဲ့က ဇွန် ၂၈ ရက်မှာ ထုတ်ပြန်ပါတယ်။
ဒီလှုပ်ရှားမှုကို ဒေါ်အောင်ဆန်းစုကြည်ရဲ့သားဖြစ်သူ ကင်မ်အဲရစ် ဦးဆောင်ပြီး သူအပါအဝင် ပြည်တွင်းပြည်ပ ဒီမိုကရေစီအရေးလှုပ်ရှားသူတွေနဲ့ မြန်မာပြည်သူတွေက ဆက်တိုက် တောင်းဆိုနေကြတာပဲ ဖြစ်ပါတယ်။
ဒါပေမဲ့ စစ်အာဏာရှင်ဘက်က ခုချိန်အထိ သက်သေတစုံတရာ ထုတ်ပြတာမျိုးမရှိဘဲ နိုင်ငံတကာနဲ့ ပြည်သူလူထုရဲ့ တောင်းဆိုချက်တွေကို မသိကျိုးကျွံပြုပြီး လျစ်လျူရှုထားဆဲပဲ ဖြစ်တယ်လို့ ဆိုပါတယ်။
ဒါကြောင့် အရင်ကထက် ပိုမိုပြင်းထန်ထိရောက်တဲ့ အစီအစဉ်တွေနဲ့ ဆက်လက်တောင်းဆိုဖို့ စီစဉ်နေပြီး ပြည်သူတွေလည်း ပူးပေါင်းကြဖို့ All In One Piece Movement အဖွဲ့က ထုတ်ပြန် တောင်းဆိုထားပါတယ်။
