ရန်ကုန်လေဆိပ်ကနေ ပြည်တွင်း၊ ပြည်ပသွားလာမဲ့ ခရီးသည်တွေထဲမှာ  ပြေး ၄ ပြေး (စစ်ပြေး၊ ရဲပြေး၊ ဝရမ်းပြေး၊ ရဲဘက်ပြေး)  မပါအောင် စိစစ်သွားမယ်လို့ စစ်ကောင်စီလက်အောက်ခံ လေဆိပ်ပူးပေါင်းညှိနိူင်းဆောင်ရွက်ရေး ကော်မတီက ဧပြီ ၂ ရက်မှာ လေကြောင်းလိုင်းတွေကို အသိပေးထားပါတယ်။

ပြေး ၄ ပြေးတွေမပါရှိအောင် ခရီးသည်တွေရဲ့ မှတ်ပုံတင်ပါ အချက်အလက်တွေကို ပြည်တွင်း၊ ပြည်ပထွက်ခွာလက်မှတ်စစ်ကောင်တာ၊ ပြည်ပဆိုက်ရောက် လေကြောင်းရဲတပ်ဖွဲ့ ကောင်တာတွေမှာ လေကြောင်းရဲတပ်ဖွဲ့က မကြာခင် စိစစ်သွားမယ်လို့ ဆိုပါတယ်။

အဲဒါကြောင့် လေကြောင်းလိုင်းတွေအနေနဲ့ ပေးပို့တဲ့ကြိုတင်ခရီးသည်စာရင်း၊ အတည်ပြု ခရီးသည်စာရင်းတွေမှာ ခရီးသည်ရဲ့ မှတ်ပုံတင်နံပတ် အပြည့်စုံထည့်သွင်းဖော်ပြဖို့၊ မြန်မာနိုင်ငံသားခရီးသည်တွေကို လက်မှတ်ရောင်းချတဲ့အခါ နိုင်ငံသားစိစစ်​ရေးကတ်နံပါတ် ​ဖြည့်သွင်းဖို့၊ လေကြောင်းလိုင်းကောင်တာမှာ Check in ဝင်ချိန်မှာ နိုင်ငံသားစိစစ်ရေးကတ် ပါဝင်အောင်စိစစ်ပေးဖို့ဆိုပြီး အသိပေးအကြောင်းကြားထားတာ ဖြစ်ပါတယ်။

အာဏာသိမ်း အသွင်ပြောင်းအဖွဲ့အနေနဲ့ လေဆိပ်ကနေ ခရီးသည်တွေရဲ့ထွက်ခွာမှုတွေကို စောင့်ကြည့် စစ်ဆေးတာတွေ တစိုက်မက်မက်လုပ်နေခဲ့တာဖြစ်ပြီး ပိုပြီးတင်းကျပ်သွားဖို့ ပြင်ဆင်နေတာ ဖြစ်နိုင်တယ်လို့ ခရီးသည်တွေက ဆိုပါတယ်။

ပြည်ပထွက်ဖို့ရှိနေတဲ့ အလုပ်သမားတယောက်က “ပြည်ပထွက်ခွင့် ပိုခက်လာမယ်ထင်တယ်။ CDM တွေနဲ့ သူတို့ အလိုရှိနေတဲ့သူ​တွေကို ပစ်မှတ်ထားတဲ့ သဘောပဲ။ အဲဒီကမှ ရည်ရွယ်ချက်ပြောင်းပြီး ပိုက်ဆံညှစ်တာတွေဖြစ်လာမှာ မြင်ယောင်သေးတယ်” လို့ ပြောပါတယ်။

အာဏာသိမ်းစစ်အုပ်စုအနေနဲ့ အတုအယောင်ရွေးကောက်ပွဲလုပ်ကာ ဟန်ပြလွှတ်တော်ကတဆင့် မင်းအောင်လှိုင်ဦးဆောင်တဲ့ အယောင်ဆောင် စစ်အစိုးရအဖွဲ့ဖွဲ့ခဲ့ပေမဲ့ အမိန့်အာဏာနဲ့ ပြည်သူတွေအပေါ်  ကန့်သတ်ထိန်းချုပ်မှုတွေ ဆက်လုပ်နေတာ ပါတယ်။