၂၀၂၂ ခုနှစ်မှာ ရုရှား-ယူကရိန်း စစ်ရေးပဋိပက္ခ ဖြစ်ပွားခဲ့ပြီးနောက်ပိုင်း ၂၀၂၆ ခုနှစ်မှာ စွမ်းအင်ဈေးနှုန်းတွေဟာ အရှေ့အလယ်ပိုင်းစစ်ပွဲကြောင့် အမြင့်ဆုံးအဆင့်ကို ရောက်နိုင်တယ်လို့ ကမ္ဘာ့ဘဏ်က  ခန့်မှန်းထားပါတယ်။

ကုန်စည်ဈေးနှုန်းတွေကတော့ ၁၆ ရာခိုင်နှုန်း မြင့်တက်လာမယ်လို့ အင်္ဂါနေ့မှာ ထုတ်ပြန်ခဲ့တဲ့ နောက်ဆုံးထွက် ကုန်စည်ဈေးကွက်အလားအလာထဲမှာ ကမ္ဘာ့ဘဏ်က ခန့်မှန်းထားတာပါ။

ကမ္ဘာလုံးဆိုင်ရာ ပင်လယ်ရေကြောင်း ရေနံစိမ်းကုန်သွယ်မှုရဲ့ ၃၅ ရာခိုင်နှုန်းလောက်ကို ကိုင်တွယ်ဖြေရှင်းပေးခဲ့တဲ့ ဟော်မုဇ်ရေလက်ကြားမှာရှိတဲ့ စွမ်းအင် အခြေခံအဆောက်အအုံတွေနဲ့ သင်္ဘောတင်ပို့မှု အနှောင့်အယှက်တွေဟာ မှတ်တမ်းတင်ထားသမျှ အကြီးမားဆုံး ရေနံဖြန့်ဖြူးမှုဆိုင်ရာ တုန်လှုပ်ချောက်ချားမှုကို ဖြစ်ပေါ်စေခဲ့တယ်လို့ဆိုပါတယ်။

ကမ္ဘာလုံးဆိုင်ရာ ရေနံအထောက်အပံ့ကိုလည်း တရက်ကို စည်ပေါင်း ၁၀ သန်းလောက် လျော့ကျသွားစေခဲ့တယ်လို့ ဆိုပါတယ်။

ယူရီးယားဈေးနှုန်း ၆၀ ရာခိုင်နှုန်း မြင့်တက်လာလို့ ဓာတ်မြေဩဇာ ဈေးနှုန်းတွေဟာလည်း ၂၀၂၆ ခုနှစ်မှာ ၃၁ ရာခိုင်နှုန်း မြင့်တက်လာမယ်လို့ ခန့်မှန်းထားပါတယ်။

အလူမီနီယမ်၊ ကြေးနီနဲ့ သံဖြူ အပါအဝင် အခြေခံသတ္တုဈေးနှုန်းတွေဟာလည်း အမြင့်ဆုံးအဆင့်ကို ရောက်ဖို့ မျှော်လင့်ထားပါတယ်။

ပထဝီနိုင်ငံရေး မရေရာမှုတွေက ဘေးကင်းလုံခြုံတဲ့ ပိုင်ဆိုင်မှုတွေအတွက် ဝယ်လိုအားကို မြင့်တက်စေလို့ အဖိုးတန်သတ္တုဈေးနှုန်းတွေ ၄၂ ရာခိုင်နှုန်းမြင့်တက်လာမယ်လို့ ခန့်မှန်းထားပါတယ်။

အီရန်စစ်ပွဲမှာ ရန်လိုမှုတွေ မြင့်တက်လာခဲ့ရင် ဒါမှမဟုတ် ထောက်ပံ့ရေး အနှောင့်အယှက်တွေက ခန့်မှန်းထားတာထက် ပိုကြာနေရင် ကုန်စည်ဈေးနှုန်းတွေ ပိုမြင့်တက်လာနိုင်တယ်လို့ အစီရင်ခံစာထဲမှာ ဖော်ပြပါတယ်။

ကမ္ဘာ့ဘဏ်အုပ်စုရဲ့ အကြီးတန်းစီးပွားရေးပညာရှင်နဲ့ ဖွံ့ဖြိုးတိုးတက်ရေး စီးပွားရေးဆိုင်ရာ အကြီးတန်းဒုတိယဥက္ကဋ္ဌ အင်ဒါမစ်ဂီလ်က စစ်ပွဲဟာ ကမ္ဘာ့စီးပွားရေးကို စုပေါင်းလှိုင်းလုံးတွေနဲ့ ရိုက်ခတ်နေပြီး ဆင်းရဲတဲ့လူဦးရေက အဆိုးရွားဆုံး ထိခိုက်ခံရလိမ့်မယ်လို့ သတိပေးပါတယ်။

Source: Reuters