အီတလီမြောက်ပိုင်း ဘိုလော့ဂ်ညာမြို့မှာ ရဲတပ်ဖွဲ့ရဲ့ ဖမ်းဆီးခံရပြီးနောက် မော်ရိုကိုနွယ်ဖွား စီးပွားရေးလုပ်ငန်းရှင် အဗ္ဗဒါရာဟင်မ်ဖာကီယာ သေဆုံးသွားခဲ့တာနဲ့ ပတ်သက်ပြီး ဆန္ဒပြပွဲတွေ ဖြစ်ပွားနေပါတယ်။
ဇူလိုင် ၂၀ ရက်က ရဲတပ်ဖွဲ့နဲ့ ဆန္ဒပြသူတွေအကြား ပြင်းပြင်းထန်ထန် ရုန်းရင်းဆန်ခတ် ထိခိုက်မှုတွေ ဖြစ်ပွားခဲ့တယ်လို့ ANSA သတင်းဌာနနဲ့ AGTW သတင်းဌာနတို့က ဖော်ပြပါတယ်။
ဇူလိုင် ၁၉ ရက် မွန်းလွဲပိုင်းမှာ အမျိုးသားတယောက်က ရမ်းကားပြုမူပြီး ကားတစီးကို ဖျက်ဆီးနေကြောင်း တိုင်ကြားချက်ကြောင့် ရဲတပ်ဖွဲ့ ရောက်ရှိလာခဲ့ပါတယ်။
အဲဒီနောက် ပစ္စည်းရွှေ့ပြောင်းရေးနဲ့ သန့်ရှင်းရေး အသေးစားလုပ်ငန်း လုပ်ကိုင်နေတဲ့ စီးပွားရေးလုပ်ငန်းရှင် အဗ္ဗဒါရာဟင်မ်ဖာကီယာနဲ့ ရဲတပ်ဖွဲ့တို့ ပဋိပက္ခ ဖြစ်ပွားခဲ့ရာမှာ ရဲတွေက ငရုတ်ကောင်းဖျန်းဆေးကို သုံးပြီး သူ့ကို လက်ထိပ်ခတ်ဖို့ မြေပြင်ပေါ် မှောက်လျက် ဖိချုပ်ထားခဲ့ပါတယ်။
ဖာကီယာဟာ ရမ်းကားဖျက်ဆီးနေသူ ဟုတ်၊ မဟုတ် ဆိုတာနဲ့ ရဲတွေရောက်လာချိန်မှာ အနီးအနားမှာ ရှိနေသူ ဖြစ်နိုင်၊ မဖြစ်နိုင် ဆိုတာကိုတော့ သေချာ ရှင်းရှင်းလင်းလင်း မသိရသေးပါဘူး။
မြို့ခံတယောက် ရိုက်ကူးထားတဲ့ ရုပ်သံဖိုင်ထဲမှာတော့ ဖာကီယာဟာ မြေကြီးပေါ် မှောက်လျက် လဲကျနေပြီး ရဲအရာရှိ ၂ ယောက်က သူ့ကို ချုပ်နှောင်ထားပါတယ်။ သူဟာ အကူအညီတောင်းပြီး အသက်ရှူရခက်ကြောင်း ထပ်ခါတလဲလဲ အော်ဟစ်နေခဲ့ကာ နောက်ပိုင်းမှာ လှုပ်ရှားမှုတွေ တဖြည်းဖြည်း ငြိမ်သက်သွားခဲ့တာ ဖြစ်ပါတယ်။
ဒီဖြစ်စဉ်ရုပ်သံဟာ အွန်လိုင်းမှာ ပျံ့နှံ့သွားခဲ့ပြီး လူပေါင်း ရာနဲ့ချီ ထွက်ပေါ်လာပြီး ဆန္ဒပြခဲ့ကြတာပါ။ ဆန္ဒပြသူတွေက လမ်းတွေကို စက်ဘီးတွေနဲ့ ပိတ်ဆို့ပြီး ပစ္စည်းတွေနဲ့ ပစ်ပေါက်ခဲ့ကြတာကြောင့် ရဲတပ်ဖွဲ့ဟာ ရေအမြောက်နဲ့ မျက်ရည်ယိုဗုံးတွေကို ပစ်ခတ် လူစုခွဲခဲ့ပါတယ်။
ဒီဖြစ်စဉ်နဲ့ပတ်သက်ပြီး အတိုက်အခံ နိုင်ငံရေးသမားတွေက တာဝန်ယူမှု၊ တာဝန်ခံမှုရှိဖို့ တောင်းဆိုခဲ့ကြသလို အာဏာရ မဟာမိတ်အဖွဲ့ကတော့ ပါဝင်ပတ်သက်သူ ရဲအရာရှိတွေကို ကာကွယ်ပြောဆိုခဲ့ကြတာကြောင့် နိုင်ငံရေးအသိုက်အဝန်းအတွင်း သဘောထားကွဲလွဲမှုတွေ ဖြစ်ပေါ်ခဲ့ပါတယ်။
လက်ရှိမှာ တရားလိုရှေ့နေတွေက စုံစမ်းစစ်ဆေးမှု စတင်နေပြီဖြစ်သလို ဘိုလော့ဂ်ညာ ရဲတပ်ဖွဲ့ကလည်း ဝင်ရောက်ဟန့်တားခဲ့တဲ့ အရာရှိတွေရဲ့ ခန္ဓာကိုယ်တပ်ကင်မရာ (bodycam) ရုပ်သံတွေကို စုံစမ်းစစ်ဆေးသူတွေထံ လွှဲပြောင်းပေးသွားမှာ ဖြစ်ပါတယ်။
ပြည်ထဲရေးဝန်ကြီး မက်တီယိုပီယန်တက်ဒိုစီ ကလည်း စုံစမ်းစစ်ဆေးမှုကနေ အမှန်တရား ပေါ်ပေါက်လာမယ်လို့ အပြည့်အဝ ယုံကြည်ကြောင်း ထုတ်ဖော်ပြောကြားထားပါတယ်။
Source: Reuters
