ဒီမိုကရေစီစနစ်ဟာ ပြည်သူတွေရဲ့ အခွင့်အရေးနဲ့ တာဝန်တွေကို အာမခံပေးနိုင်တဲ့ အရေးကြီးတဲ့ အုပ်ချုပ်ရေးစနစ်ဖြစ်တယ်လို့ အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလက စက်တင်ဘာ ၁၅ ရက်မှာ ကျရောက်တဲ့ နိုင်ငံတကာဒီမိုကရေစီနေ့မှာ ပြောပါတယ်။

ကမ္ဘာတဝန်းမှာ ဒီမိုကရေစီအခြေအနေ ကျဆင်းလာနေပေမဲ့ ပြည်သူတွေရဲ့ မူလအခွင့်အရေးတွေအတွက် ဒီမိုကရေစီစနစ် မရှိမဖြစ်လိုအပ်ကြောင်း၊ မြန်မာနိုင်ငံမှာ စစ်အာဏာသိမ်းမှုကြောင့် ဒီမိုကရေစီ အသွင်ကူးပြောင်းရေးလမ်းကြောင်း ရပ်တန့်ခဲ့ရပေမဲ့ ပြည်သူတွေအနေနဲ့ ဒီမိုကရေစီနဲ့အတူ ဖက်ဒရယ်စနစ်ကိုပါ ပူးတွဲတည်ဆောက်ဖို့ လိုအပ်တယ်လို့ ဆိုပါတယ်။

ဒါ့အပြင် ၂၀၂၁ ခုနှစ် နွေဦးတော်လှန်ရေးဟာ ဖက်ဒရယ်ဒီမိုကရေစီနိုင်ငံသစ် တည်ထောင်ရေးအတွက် ကြိုးပမ်းတဲ့လှုပ်ရှားမှုကြီးဖြစ်လို့ စစ်အာဏာရှင်စနစ် ဖယ်ရှားရေးနဲ့ နိုင်ငံတော် တည်ဆောက်ရေးလုပ်ငန်းတွေကို တပြိုင်နက်တည်း ဆောင်ရွက်သွားဖို့ လိုအပ်တယ်လို့လည်း ဆိုပါတယ်။