စစ်အာဏာရှင်တပ်ရဲ့ မတရားဖမ်းဆီး အကျဉ်းချခြင်းကို ၅ နှစ်ကျော်ကြာ ခံခဲ့ရတဲ့ နိုင်ငံတော်သမ္မတ ဦးဝင်းမြင့် မိသားစုထံ ပြန်လည်ရောက်ရှိလာတဲ့အပေါ် ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးဦးဆောင်ကောင်စီ (SCEF) က ဝမ်းမြောက်ကြောင်း ဧပြီ ၂၂ ရက်မှာ သဝဏ်လွှာ ပေးပို့လိုက်ပါတယ်။
၂၀၂၁ ခုနှစ် ဖေဖော်ဝါရီ ၁ ရက်မှာ သမ္မတအဖြစ် တာဝန်ထမ်းဆောင်နေစဉ် အာဏာသိမ်းစစ်တပ်က ဖမ်းဆီးတာကို ခံခဲ့ရတဲ့ သမ္မတဦးဝင်းမြင့်ဟာ ၅ နှစ်ကျော်အကြာ ၂၀၂၆ ခုနှစ် ဧပြီ ၁၇ ရက်မှာ မိသားစုထံ ပြန်လည်ရောက်ရှိခဲ့တာပါ။
ဒီအခြေအနေအပေါ် မိသားစုဝင်တွေနဲ့အတူ မြန်မာနိုင်ငံသားအားလုံးနဲ့ထပ်တူ ဝမ်းမြောက်ဝမ်းသာ ဖြစ်ရတယ်လို့ SCEF က ဒီကနေ့ရက်စွဲနဲ့ ထုတ်ပြန်တဲ့ သဝဏ်လွှာမှာ ဖော်ပြထားပါတယ်။
ဒါ့အပြင် နိုင်ငံတော်သမ္မတ ဦးဝင်းမြင့်အနေနဲ့ ကျန်းမာခိုင်မာစွာဖြင့် နိုင်ငံ့အကျိုးကို ဘေးအန္တရာယ် ကင်းစွာ ဆက်လက်သယ်ပိုးနိုင်ပါစေကြောင်း ဆန္ဒပြုထားသလို မတရား ဖမ်းဆီးခံထားရဆဲဖြစ်တဲ့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားအားလုံး ခြွင်းချက် မရှိ အမြန်ဆုံး လွတ်မြောက်ရေးအတွက်လည်း တိုင်းရင်းသားပြည်သူတွေနဲ့အတူ အစွမ်းကုန် ဆက်လက်ကြိုးပမ်းသွားမယ်လို့ SCEF က ကတိပြု ပြောကြားထားပါတယ်။
SCEF ကို အမျိုးသားညီညွတ်ရေးအစိုးရ (NUG)၊ ပြည်သူ့လွှတ်တော်ကိုယ်စားပြုကော်မတီ (CRPH)၊ ကရင်နီအမျိုးသားတိုးတက်ရေးပါတီ (KNPP)၊ ကချင်လွတ်လပ်ရေးတပ်မတော် (KIA)၊ ကရင်အမျိုးသားအစည်းအရုံး (KNU) နဲ့ ချင်းအမျိုးသားတပ်ဦး (CNF) တို့ ပါဝင်ဖွဲ့စည်းထားတာ ဖြစ်ပါတယ်။
