ရန်ကုန်တိုင်း၊ မင်္ဂလာဒုံမြို့နယ်နဲ့ ပဲခူးတိုင်း ဘုရားကြီးမြို့တို့မှာ ငွေကျပ် ၄ ဒသမ ၂ ဘီလီယံကျော် တန်ဖိုးရှိ မူးယစ်ဆေးတွေ ဖမ်းဆီးမိခဲ့တယ်လို့ မြန်မာနိုင်ငံ ရဲတပ်ဖွဲ့က ထုတ်ပြန်ပါတယ်။
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ နိုဝင်ဘာ ၂၇ ရက်နေ့ နေ့လယ် ၁၂ နာရီခွဲလောက်က မူးယစ်ဆေးသတင်းရ ဒီးမော့ဆိုမြို့နယ်၊ ယပ်ခူကျေးရွာအနီးမှာ စိုင်းခင်လှ(ခ)ခင်လှ မောင်းနှင်ပြီး ထွန်းကျင်(ခ)ထွန်းစိန်နဲ့ ခိုင်ကိုထွန်း(ခ)ခိုင်ကိုတို့ လိုက်ပါလာတဲ့ Mark II ယာဉ်ကို ဖမ်းဆီးခဲ့ပါတယ်။
အဲဒီယာဉ်နဲ့ အသွင်ယူပြီး မူးယစ်ဆေးဝါးသိုဝှက်သယ်ဆောင်ထားတဲ့ CANTA အမျိုးအစားမော်တော်ယာဉ်ကို လျှို့ဝှက်လိုက်ပါစောင့်ကြည့်ခဲ့ရာ လိပ်သို-ယာဒိုက တစ်ဆင့် တောင်ငူ-ပဲခူး-ရန်ကုန်အထိ ဆက်လက်မောင်းနှင်လာခဲ့တယ်လို့ ဆိုပါတယ်။
ယာဉ်အား နိုဝင်ဘာလ ၂၈ ရက်နေ့ မနက် ၁ နာရီလောက် ရန်ကုန်-နေပြည်တော်အမြန်လမ်း၊ ရန်ကုန်တိုးဂိတ်အနီးမှာ စစ်ဆေးရှာဖွေရာ ယာဉ်မောင်းပန်းပန်းနဲ့ CANTA ယာဉ်ကိုယ်ထည်ကြမ်းခင်းအောက် အံဝှက်ပြုလုပ် သယ်ဆောင်လာတဲ့ စိတ်ကြွရူးသွပ်ဆေးပြား ၄,၆၆၀,၀၀၀ ပြား သိမ်းဆည်းရမိခဲ့ပါတယ်။
ဒီနောက် အဲဒီမူးယစ်ဆေးဝါးတွေ ယူမယ့်သူတွေကို ဆက်သွယ်ချက်အရ ညနေ ၄ နာရီခွဲလောက်မှာ စိတ်ကြွရူးသွပ်ဆေးပြား ၃,၀၀၀,၀၀၀ ပြား လက်ခံယူမယ့် မင်းမင်း(ခ)အောင်အောင်နဲ့ မူးယစ်ဆေးဝါးတွေ ယူဆောင်ခိုင်းတဲ့ ဝေလ၊ စိတ်ကြွရူးသွပ်ဆေးပြား ၁,၆၆၀,၀၀၀ ပြားအား လက်ခံယူမယ့် ကိုမျိုး(ခ)မျိုးသိုက်နဲ့ ထွန်းထွန်းနိုင်(ခ)ထွန်းမောင်တို့ကို လှိုင်သာယာ(အနောက်ပိုင်း) မြို့နယ်မှာ ထပ်မံ ဖမ်းဆီးခဲ့ပါတယ်။
အလားတူ နိုဝင်ဘာ ၂၉ ရက်နေ့ နေ့လယ် ၂ နာရီလောက်ကလည်း ပဲခူးမြို့နယ်၊ ဘုရားကြီးမြို့အထွက် ရွှေသံလွင်ပူးပေါင်းစစ်ဆေးရေးဂိတ်မှာ ဘုရားကြီးမြို့ဘက်ကနေ ဝေါမြို့ဘက်ကို နေအောင်၊ မောင်းနှင်လာတဲ့ အဖြူရောင် ၁၂ ဘီးအမျိုးအစားမော်တော်ယာဉ်ကို ရှာဖွေရာက စိတ်ကြွရူးသွပ်ဆေးပြား ၉၇၅,၀၀၀ ပြားသိမ်းဆည်းရမိခဲ့ပါတယ်။
ယာဉ်မောင်းအား စစ်ဆေးဖော်ထုတ်ချက်အရ ရဲဝင်းအောင်နဲ့ ဖြိုးဝေအောင်တို့မှာ Suzuki အမျိုးအစားယာဉ်နဲ့ ရှေ့ပြေးလမ်းပြယာဉ်အဖြစ်မောင်းနှင်သွားကြောင်းသိရလို့ မော်တော်ယာဉ်အား ကျိုက်ထိုမြို့နယ်၊ စစ်တောင်းတံတားမှာ ထပ်မံဖမ်းဆီးမိခဲ့တယ်လို့ ဆိုပါတယ်။
ရန်ကုန်တိုင်း၊ မင်္ဂလာဒုံမြို့နယ်မှာ ရှမ်းပြည်နယ်(တောင်ပိုင်း)၊ နမ့်စန်ကနေ ငွေကျပ် ၂.၇၉၆ ဘီလီယံကျော် တန်ဖိုးရှိ စိတ်ကြွဆေးပြား ၄,၆၆၀,၀၀၀ ပြား သယ်လာတဲ့ တရားခံ ၈ ယောက်နဲ့ ပဲခူးတိုင်း ဘုရားကြီးမြို့မှာ ရှမ်းပြည်နယ်(မြောက်ပိုင်း)၊ တန့်ယန်းကနေ မွန်ပြည်နယ်၊ မော်လမြိုင်မြို့ဆီ ငွေကျပ် ၁.၄၆ ဘီလီယံကျော်တန်ဖိုးရှိ စိတ်ကြွဆေးပြား ၁,၆၆၀,၀၀၀ ပြား သယ်လာတဲ့ တရားခံ ၃ ယောက် စုစုပေါင်း ၁၁ ယောက်ကို ဖမ်းမိခဲ့ပြီး ဥပဒေအရ အမှုဖွင့်ထားတယ်လို့ ဆိုပါတယ်။
