ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်မှာ အချုပ်သား ၃ ဦးအပါအဝင် ကိုဗစ်-၁၉ လူနာသစ် ၄ ဦး ထပ်မံတွေ့ရှိတယ်လို့ အုတ်ဖိုကျန်းမာရေးဦးစီးဌာနက နိုဝင်ဘာ ၂၈ ရက်နေ့ ညမှာ ထုတ်ပြန်ပါတယ်။
ဓာတ်ခွဲနမူနာ စုစုပေါင်း ၁၀၁ ခုကိုပေးပို့ စစ်ဆေးချက်အရ အချုပ်သား ၃ ဦးနဲ့ Quarantine ဝင်နေသူ ၁ ဦးတို့မှာ ရောဂါပိုးတွေ့ရှိခဲ့တာလို့ အုတ်ဖိုမြို့နယ် ပြည်သူ့ကျန်းမာရေးဦးစီးဌာန လက်ထောက်ဦးစီးမှူး ဦးအေးမင်းထွန်းက ပြောပါတယ်။
အုတ်ဖိုမြို့နယ် အေးမြသာယာနယ်မြေရဲစခန်းက ရဲတပ်ဖွဲ့ဝင် ၁ ဦးပိုးတွေ့ခဲ့တာကြောင့် ရဲစခန်းကို နိုဝင်ဘာ ၁၉ ရက်နေ့ကတည်းက လော့ဒေါင်းချထားပြီး ရဲတပ်ဖွဲ့ဝင်တွေနဲ့ အချုပ်သားတွေကို ဓာတ်ခွဲနမူနာယူ ပေးပို့စစ်ဆေးရာ အချုပ်သား ၃ ဦးမှာ ရောဂါပိုးတွေ့ရှိခဲ့တာလို့ ကျန်းမာရေးဝန်ထမ်းတဦးက ပြောပါတယ်။
ရောဂါပိုးတွေ့ရှိတဲ့ အချုပ်သား ၃ ဦးကို ဘယ်မှာကုသမယ်ဆိုတာ ရဲတပ်ဖွဲ့က ခရိုင်နဲ့ ကျန်းမာရေးဌာနက တိုင်းကို တင်ပြထားတယ်လို့ အုတ်ဖိုမြို့နယ် ဆရာဝန်ကြီး ဒေါက်တာသန့်ဇော်မောင်က ပြောပါတယ်။
အုတ်ဖိုမြို့နယ်မှာ နိုဝင်ဘာလ ၂၈ ရက်နေ့အထိ အတည်ပြုလူနာ ၁၀၆ ဦးထိရှိလာပြီး ဆေးရုံဆင်းခွင့်ရရှိသူ ၈၂ ဦး၊ ဆေးကုသပေးနေသူ ၂၄ ဦး ရှိတယ်လို့ သိရပါတယ်။
သတင်း - သက်နိုင်ဝင်း
