ပဲခူးတိုင်း၊ အုတ်ဖိုမြို့နယ်ထဲက တော်လှန်ရေးတပ်စခန်းတခုကို ဩဂုတ် ၂ ရက် နေ့လယ်ပိုင်းမှာ ​ဗုံးကြဲခံလိုက်ရလို့ ပျက်စီးဆုံးရှုံးမှု များပြားကာ တော်လှန်ရေးတပ်ဖွဲ့ဝင်တချို့လည်း ထိခိုက်ဒဏ်ရာ ရရှိခဲ့တယ်လို့ တော်လှန်ရေးတပ်ဖွဲ့ဝင်တွေဆီကနေ သိရပါတယ်။

အုတ်ဖိုအခြေစိုက်တော်လှန်ရေးတပ်ဖွဲ့ဝင်တယောက်က “အုတ်ဖိုအရှေ့ခြမ်း ၁၂ မိုင်လောက်မှာ ရှိတဲ့ ဂမုန်းဆည်ဝန်းကျင်မှာ အခြေစိုက်တဲ့ စခန်းတွေကို ဂျက်ဖိုက်တာနဲ့ ဗုံးကြဲသွားတာပါ” လို့ ပြောပါတယ်။

အဆိုပါ ဗုံးကြဲတိုက်ခိုက်ခံရတဲ့ တော်လှန်ရေးတပ်စခန်းဟာ သာယာဝတီခရိုင် ပြည်သူ့ကာကွယ်ရေးအဖွဲ့ (ပကဖ) တိုက်ခိုက်ရေးတပ်ဖွဲ့ တပ်ခွဲ ၃ စခန်း ဖြစ်တယ်လို့ သိရပေမဲ့ အဆိုပါတပ်ဖွဲ့ဘက်ကတော့ ထုတ်ပြန်လာတာ မတွေ့ရသေးပါဘူး။

သာယာဝတီခရိုင် တပ်ရင်းတခုရဲ့ တပ်ခွဲမှူးတယောက်က “မနက်ပိုင်းမှာ ကင်းထောက်ခံရပြီး နေ့လယ် ၁ နာရီလောက်မှာ ဖိုက်တာနဲ့ ပေါင် ၂၅၀ ဗုံး ၇ လုံးကြဲသွားတာမှာ ရှေ့တန်းစခန်းကို ၃ လုံး၊ နောက်တန်း ထုတ်လုပ်ရေးစခန်းကို ၃ လုံး အကြဲခံလိုက်ရတယ်။ ၁ လုံးကတော့ ဆည်ထဲ ကျသွားတယ်။ ရှေ့တန်းစခန်းကော၊ ​ထုတ်လုပ်ရေးစခန်းပါ အကြဲခံလိုက်ရတာ ဆိုတော့ ပျက်စီးဆုံးရှုံးမှုကတော့ များ​တယ်။ သူတို့ရဲဘော် ၂ ယောက်လည်း မစိုးရိမ်ရတဲ့ ဒဏ်ရာတွေ ရတယ်။ စခန်းတည်နေရာကို တပ်ပြေးတယောက်က သတင်းပေးလို့ ဆိုလား၊ ပြည်သူဘက်က သတင်းပေးလို့ ဆိုလား သေချာတော့ မသိရသေးဘူးဗျ” လို့ ပြောပါတယ်။

သာယာဝတီခရိုင်အတွင်းမှာ တော်လှန်ရေးတပ်ဖွဲ့တွေနဲ့ စစ်တပ်ရဲ့ မြေပြင်စစ်ကြောင်းတွေ စစ်ရေးအခြေအနေ တင်းမာတဲ့နေရာတွေ ရှိနေသလို စစ်တပ်ဘက်ကလည်း ​လေကြောင်း တိုက်ခိုက်တာတွေ ဆက်တိုက်ပြုလုပ်နေတာကြောင့် ပြည်သူတွေနဲ့ တော်လှန်ရေးတပ်ဖွဲ့တွေအနေနဲ့ လေကြောင်းရန်အန္တရာယ် သတိထား နေထိုင်ကြဖို့နဲ့ လေကြောင်းအန္တရာယ် သတိပေးချက်တွေကို နားစွင့်ကြဖို့လည်း တော်လှန်ရေးအင်အားစုတွေဘက်က တိုက်တွန်းထားပါတယ်။