မကွေးတိုင်းမှာ အောက်တိုဘာလ ၁၀ ရက်နေ့က ကိုဗစ်-၁၉ အတည်ပြုလူနာသစ် ၁၈ ဦး ထပ်မံတွေ့ရှိခဲ့တယ်လို့ တိုင်းပြည်သူ့ကျန်းမာရေးဦးစီးဌာနကနေ သိရပါတယ်။
ရန်ကုန် NHL ကို ပေးပို့ထားတဲ့ ဓာတ်ခွဲနမူနာ စစ်ဆေးချက်တွေအရ ရေနံချောင်းမြို့နယ်မှာ ၇ ဦး၊ မကွေးမြို့နယ်က ၂ ဦးနဲ့ နတ်မောက်မြို့နယ်က ၂ ဦးတို့မှာ ကိုဗစ်-၁၉ ရောဂါပိုး တွေ့ရှိခဲ့တာလို့ မကွေးတိုင်းဒေသကြီး ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာခင်မောင်သန်းက ဒီဗွီဘီကို ပြောပါတယ်။
ဒါ့အပြင် မြို့နယ်အလိုက် Test Kits နဲ့ အမြန်စစ်ဆေးချက်တွေအရ အောင်လံမြို့နယ်က အမျိုးသမီး ၃ ဦး၊ သရက်မြို့နယ်က အမျိုးသား ၁ ဦး၊ အမျိုးသမီး ၁ ဦး နဲ့ နတ်မောက်မြို့နယ်က အမျိုးသမီး ၂ ဦးမှာ ကိုဗစ်ရောဂါပိုးတွေ့ရှိခဲ့ပြီး ရန်ကုန် လှိုင်သာယာအထည်ချုပ်စက်ရုံက ပြန်လာသူတွေ ဖြစ်တယ်လို့ ဆိုပါတယ်။
အဲဒီလူနာတွေကို သက်ဆိုင်ရာမြို့နယ်အလိုက် သီးခြားထားရှိကုသပေးမှာဖြစ်ပြီး လူနာတွေနဲ့ ထိစပ်ခဲ့သူတွေအပါဝင်၊ သွားလာခဲ့တဲ့ ရပ်ကွက်/ကျေးရွာတချို့ကို အသွားလာကန့်သတ်ကာ ဓာတ်ခွဲနမူနာ ပေးပို့စစ်ဆေးတာတွေ လုပ်ဆောင်မယ်လို့ ဒေါက်တာခင်မောင်သန်းက ပြောပါတယ်။
မကွေးတိုင်းမှာ မြို့နယ်အလိုက် Test Kits အရေအတွက် ၄၀၀၀ ဖြန့်ဝေထားပြီး အောက်တိုဘာ ၅ ရက်နေ့ကနေ ၁၀ ရက်နေ့ထိ စစ်ဆေးချက်တွေအရ ကိုဗစ်-၁၉ အတည်ပြုလူနာ ၄၇ ဦးတွေ့ရှိထားတယ်လို့ သိရပါတယ်။
မကွေးတိုင်းဒေသကြီးအတွင်းမှာ အောက်တိုဘာ ၁၀ ရက်နေ့ ညပိုင်းအထိ ကိုဗစ်-၁၉ အတည်ပြုလူနာ ၁၆၇ ဦး၊ ဆေးရုံဆင်းခွင့်ရရှိသူ ၄၈ ဦးရှိတယ်လို့ တိုင်းဒေသကြီး ပြည်သူ့ကျန်းမာရေးဦးစီးဌာနကနေ သိရပါတယ်။
သတင်း-မင်းထီး
