ဧရာဝတီတိုင်း၊ ပုသိမ်မြို့စစ်အခြေခံလေ့ကျင့်ရေးတပ်မှာ စစ်သင်တန်းတက်နေတဲ့ စစ်မှုထမ်းလူငယ် ၃ ယောက် ထွက်ပြေးရာမှ ပစ်ခတ်ဖမ်းဆီးခံရပြီး တယောက်သေ ဆုံး ၂ ယောက် ဒဏ်ရာတွေ ရရှိခဲ့တယ်လို့ တပ်နဲ့နီးစပ်သူတွေဆီက သိရပါတယ်။

ပုသိမ်မြို့၊ ရွှေမြင်တင်ကျေးရွာ၊ အမှတ် ၆ စစ်အခြေခံလေ့ကျင့်ရေးတပ် (စခတ-၆)မှာ စစ်မှုထမ်း သင်တန်းတက်နေတဲ့ လူငယ် ၃ ယောက် သြဂုတ် ၄ ရက်မနက်က ထွက်ပြေးရာမှ စစ်အာဏာရှင် တပ်ရဲ့ သေနတ်နဲ့ပစ်ခတ်ဖမ်းဆီးခံရပြီး တယောက်သေဆုံးကာ ၂ ယောက် ဒဏ်ရာတွေ ရရှိခဲ့လို့ သိရပါတယ်။

စစ်အာဏာရှင်တပ်နဲ့ နီးစပ်သူက “တန်းစီဖို့လုပ်တော့ လူလျော့သွားပြီး ပြေးသွားတာကို သိသွားတာ။ ချက်ချင်းဆိုသလို လိုက်ရှာကြတာ။ ရွှေမြင်တင်ရွာမှာပဲ ပြန်မိတာ။ ထွက်ပြေးလို့ သေနတ်နဲ့ ပစ်ဖမ်းတာ တယောက်ကဆုံးသွားတယ်” လို့ပြောပါတယ်။

ထွက်ပြေးတဲ့လူငယ် ၃ ယောက်ဟာ ရန်ကုန်တိုင်း၊ တွံတေးနဲ့ လှိုင်သာယာမြို့နယ်တွေဘက်ကနေ စစ်မှုထမ်းအမှတ် စဉ် ၂၇ တက်ဖို့အတွက် အဓမ္မစုဆောင်းပို့ဆောင်းခံထားရတဲ့ လူငယ်တွေ ဖြစ်တယ်လို့ သိရပါတယ်။

တပ်အတွင်းအခြေအနေကိုသိရှိတဲ့ သတင်းရင်းမြစ်တယောက်က “ထွက်ပြေးတဲ့ ကောင်လေးတွေက လစာကောင်းတဲ့ အလုပ်ရမယ်ဆိုပြီး လိမ်လည်ပေါ်တာဆွဲ ခံရတာလို့ သိရတယ်။ အမှတ် ၆ ကနေ ထွက်ပြေးတဲ့ကိစ္စကို သတင်းဖုံးထားတယ်။ ဒဏ်ရာရ ၂ ယောက်ကို ဆေးကုပေးနေတယ်” လို့ ပြောပါတယ်။

စစ်အာဏာရှင်တပ်အရာရှိတွေက ပုသိမ်စစ်အခြေခံလေ့ကျင့်ရေးတပ်ကနေ ထွက်ပြေးတဲ့ စစ်မှုထမ်း တပ်သားတွေကို အသည်းအသန်လိုက်လံရှာဖွေကာ ပြန်ဖမ်းမိပါက နေပူ လှန်တာ၊ ကြိုးတုပ်ပြီး သတိလစ်တဲ့အထိ ရိုက်တာ၊ အစာအငတ်ထားတာ၊ အုတ်ခဲမ အပြစ်ပေးတာ၊ ခြေနဲ့လက်တွေကို ၇ ရက် ထိပ်တုံးခတ်ထားတာတွေ လုပ်နေတယ်လို့ သိရပါတယ်။

လတ်တလောအနေနဲ့ ထွက်ပြေးတပ်သားသစ်တွေကို လိုက်လံရှာဖွေ ပစ်ခတ်သတ်ဖြတ် ထားတဲ့ အပြင် ကျန်တဲ့ စစ်မှုထမ်းတပ်သားတွေကို တင်းတင်းကျပ်ကျပ် ထိန်းချုပ်ထားပြီး လက်ကိုင်ဖုန်း တွေလည်း သိမ်းယူထားတယ်လို့ ပုသိမ်အမှတ် ၆ စစ်အခြေခံလေ့ကျင့်ရေးတပ်နဲ့နီးစပ်သူက ဆိုပါတယ်။