ဧရာဝတီတိုင်းဒေသကြီးမှာ စက်တင်ဘာ ၃၀ ရက်နေ့က ကိုဗစ်-၁၉ အတည်ပြုလူနာ ၈၈ ဦးထပ်တိုးခဲ့ပြီး အတည်ပြုလူနာဦးရေ ၃၂၂ ဦးထိ ရှိလာပြီဖြစ်တယ်လို့ တိုင်းပြည်သူ့ကျန်းမာရေးနှင့် ကုသရေးဦးစီးဌာနရဲ့ သတင်းထုတ်ပြန်ချက်တွေ သိရပါတယ်။
ထပ်တိုးခဲ့တဲ့ အတည်ပြုလူနာသစ် ၈၈ ဦးမှာ အများဆုံးက မအူပင်မြို့နယ်ကဖြစ်ပြီး အတည်ပြုလူနာ ၅၇ ဦးထိ တွေ့ရှိခဲ့တာပါ။
ဧရာဝတီတိုင်း ပြည်သူကျန်းမာရေး ဦးစီးဌာနရဲ့ အောက်တိုဘာ ၁ ရက်နေ့ မနက် ၉ နာရီ သတင်းထုတ်ပြန်ချက်အရ မအူပင်မြို့နယ်မှာ ၅၇ ဦး၊ ပုသိမ်မြို့နယ်မှာ ၂၇ ဦး၊ ညောင်တုန်းမြို့နယ်နဲ့ ဝါးခယ်မမြို့နယ်တို့မှာ ၂ ဦးစီ တွေ့ရှိခဲ့တာလို့ သိရပါတယ်။
ဧရာဝတီတိုင်းအတွင်းရှိ ခရိုင် ၆ ခရိုင်မှာ ကိုဗစ်-၁၉ ရောဂါပိုးတွေ့ရှိတဲ့ အတည်ပြုလူနာ တွေကို ကုသပေးဖို့အတွက်နေရာ ၁၅ နေရာ စီစဉ်ထားပြီး လူနာ ၇၇၅ ဦးလောက် ကုသပေးနိုင်မယ်လို့ တိုင်းအစိုးရအဖွဲ့ ပြောရေးဆိုခွင့်ရှိသူ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေး ဝန်ကြီး ဦးဝင်းဌေးက ပြီးခဲ့တဲ့ ရက်ပိုင်းက ပြောကြားထားပါတယ်။
ဧရာဝတီတိုင်းအတွင်းက ကိုဗစ်-၁၉ ရောဂါပိုးတွေ့ အတည်ပြုလူနာထဲက အောက်တိုဘာလ ၁ ရက်နေ့အထိ လူနာ ၉၁ ဦး ကျန်းမာရေးကောင်းမွန်လာလို့ ဆေးရုံက ဆင်းသွားပြီလို့ သိရပါတယ်။
သတင်း - မင်းထက်မုန်း (ပုသိမ်)
