ကွန်ဂိုဒီမိုကရက်တစ်သမ္မတနိုင်ငံက ကျန်းမာရေးအာဏာပိုင်တွေဟာ အစ်တူရီ၊ မြောက်ကီဗူးနဲ့ တောင်ကီဗူး ပြည်နယ်တွေမှာ အီဘိုလာရောဂါ အတည်ပြုလူနာ ၁,၅၆၀ ကျော်ကို တွေ့ထားပြီလို့ အစီရင်ခံခဲ့တဲ့အကြောင်း ကုလသမဂ္ဂက ဇူလိုင် ၆ ရက်မှာ ပြောပါတယ်။

ရွှေ့ပြောင်းနေရာတွေမှာ အခြေအနေဆိုးရွားနေလို့ အန္တရာယ်တွေ မြင့်တက်လာနေတယ်လို့လည်း သတိပေးခဲ့ပါတယ်။

ကုလသမဂ္ဂ ပြောရေးဆိုခွင့်ရှိသူ စတီဖင် ဒူဂျာရစ်က အစ်တူရီပြည်နယ်ဟာ ကပ်ရောဂါရဲ့ ဗဟိုချက်အဖြစ် ဆက်ရှိနေပြီး ရွှေ့ပြောင်းနေထိုင်ရာနေရာ အနည်းဆုံး ၄ ခုမှာ အီဘိုလာရောဂါ ကူးစက်နေတာ တွေ့ခဲ့ရတယ်လို့လည်း ပြောပါတယ်။

ရေ၊ မိလ္လာနဲ့ သန့်ရှင်းရေးအခြေအနေ ညံ့ဖျင်းမှုက အထူးစိုးရိမ်စရာဖြစ်နေတယ်လို့လည်း သူက ဆက်ပြောပါတယ်။

တုံ့ပြန်ရေးလုပ်ငန်းတွေ ဆက်လုပ်နေပေမဲ့ လူသားချင်းစာနာထောက်ထားမှုဆိုင်ရာ မိတ်ဖက်တွေက ရန်ပုံငွေပြတ်လပ်မှုကြောင့် ရွှေ့ပြောင်းနေထိုင်သူ ၂၇၃,၀၀၀ ကျော်ဟာ အရေးပေါ်လိုအပ်ချက်တွေနဲ့ ရင်ဆိုင်နေရပါတယ်။

အစ်တူရီပြည်နယ်က ရွှေ့ပြောင်းနေထိုင်ရာ နေရာတွေမှာ လုပ်ငန်းလည်ပတ်မှုကို ကန့်သတ်ထားတယ်လို့လည်း ပြောပါတယ်။

ဇူလိုင် ၄ ရက်ကစပြီး တောင်ကီဗူးပြည်နယ်မှာ အကြမ်းဖက်နှုန်း မြင့်တက်လာလို့ အရပ်သား ၅ ယောက်ထက်မနည်း သေဆုံးခဲ့ပြီး အများအပြား ဒဏ်ရာရခဲ့တဲ့အပြင် လူ ၆,၀၀၀ ထက်မနည်း အိုးမဲ့အိမ်မဲ့ ဖြစ်ခဲ့ရတယ်၊ ထောက်ပံ့ရေးလမ်းကြောင်းတွေလည်း အနှောင့်အယှက်ဖြစ်ခဲ့ပြီး လူသားချင်းစာနာထောက်ထားမှုဆိုင်ရာ အကဲဖြတ်မှုတွေကို နှောင့်နှေးစေခဲ့တယ်လို့ ကုလသမဂ္ဂက ပြောပါတယ်။

ကွန်ဂိုနိုင်ငံရဲ့ လူသားချင်းစာနာထောက်ထားမှုဆိုင်ရာ ပန်ကြားချက်ကို ၅၄ ရာခိုင်နှုန်း ရန်ပုံငွေ ထောက်ပံ့ထားပြီး ဒေါ်လာ ၁ ဒသမ ၄ ဘီလီယံ လိုအပ်တဲ့အနက် ဒေါ်လာ ၇၅၂ သန်း ရထားပါတယ်။

Source: Reuters