ကျန်းမာရေးနဲ့အားကစားဝန်ကြီးဌာနက ဒီနေ့မနက်ထုတ်ပြန်တဲ့ ကိုဗစ်-၁၉ လူနာသစ် ၂၆ ဦး ထဲမှာ ရခိုင်ပြည်နယ်က ၂၅ ဦးနဲ့ ပဲခူးတိုင်းဒေသကြီး၊ တောင်ငူမြို့နယ်က အမျိုးသမီး ၁ ဦးပါဝင်တာကို တွေ့ရပါတယ်။
ရခိုင်ပြည်နယ်က လူနာသစ်တွေကတော့ စစ်တွေမြို့နယ်က ၁၅ ဦး၊ ကျောက်ဖြူမြို့နယ်က ၃ ဦး၊ မောင်တောမြို့နယ်က ၆ ဦးနဲ့ ပေါက်တောမြို့နယ်က အမျိုးသား ၁ ဦးတို့ပါဝင်ပါတယ်။
လူနာသစ်အားလုံးဟာ ပြည်ပကိုခရီးသွားခဲ့တဲ့ရာဇဝင်မရှိသူတွေဖြစ်ပြီး ကျောက်ဖြူဆေးရုံက စောင့်ကြည့်လူနာ အမျိုးသားတစ်ဦးကလွဲလို့ ကျန်သူတွေက အသွားအလာကန့်သတ် ကွာရန်တင်းထားရှိသူတွေဖြစ်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၅၆၄ ခု၊ ဆေးသုတေသနဦးစီးဌာနက ၂၅ ခုနဲ့ ပြည်သူ့ဆေးရုံကြီး ကျောက်ဖြူမြို့က ၃၂ ခု၊ စုစုပေါင်း ၆၂၁ ခုအား စစ်ဆေးခဲ့ပြီး လူနာသစ် ၂၆ ဦး တွေ့ရှိခဲ့တာပါ။
မနေ့ညကလည်း ပထမသုတ်အဖြစ် ဓာတ်ခွဲနမူနာ ၁,၃၅၅ ခုစစ်ဆေးရာမှာ လူနာသစ် ၁၆ ဦး တွေ့ရှိခဲ့ပါတယ်။
မြန်မာနိုင်ငံမှာ ဒီနေ့မနက်ပိုင်းအထိ ကိုဗစ်-၁၉ အတည်ပြုလူနာ ၆၂၈ ဦး၊ သေဆုံးသူ ၆ ဦးနဲ့ ရောဂါပိုးကင်းစင်လာသူ စုစုပေါင်း ၃၄၉ ဦး၊ ဆေးရုံမှဆင်းခွင့်ပြုခဲ့သူ ၃၃၉ ဦးနဲ့ စောင့်ကြည့်လူနာအသစ် ၆၇ ဦးရှိပါတယ်။
