ရခိုင်ပြည်နယ် စစ်တွေမြို့မှာ ပြည်ပခရီးသွားရာဇဝင်မရှိတဲ့ ကိုဗစ်-၁၉ လူနာသစ် ၁၃ ဦး ထပ်မံတွေ့ရှိတယ်လို့ ကျန်းမာရေးနှင့်အားကစားဝန်ကြီးဌာနက ဒီနေ့မနက် ထုတ်ပြန်ပါတယ်။
သြဂုတ် ၂၃ ရက်နေ့အတွက် ဒုတိယသုတ်အဖြစ် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၁၈၇ ခု စစ်ဆေးရာမှာ အတည်ပြုလူနာသစ် ၁၃ ဦးတွေ့ရှိခဲ့တာပါ။
လူနာသစ် ၁၃ ဦးဟာ ကိုဗစ်-၁၉ အတည်ပြုလူနာအမှတ် ၃၉၇၊ ၃၉၈၊ ၃၉၉၊ ၄၃၀ တို့နဲ့ ထိတွေ့မှုရှိခဲ့ပြီး အသွားအလာ ကန့်သတ်ထားသူတွေဖြစ်တယ်လို့ ဆိုပါတယ်။ သူတို့အားလုံးကို စစ်တွေမြို့ ပြည်သူ့ဆေးရုံကြီးမှာ ဆေးကုသမှု ခံယူစေမယ်လို့ သိရပါတယ်။
မနေ့ညက ဓာတ်ခွဲနမူနာ ၉၀၅ ခုအား စစ်ဆေးပြီးစီးခဲ့ရာမှာလည်း စစ်တွေမြို့နေ ပြည်တွင်း ကူးစက်ခံရတဲ့ အတည်ပြုလူနာသစ် ၆ ဦး တွေ့ရှိခဲ့ပါတယ်။
ရခိုင်ပြည်နယ်မှာ သြဂုတ် ၁၆ ရက်ကနေ ဒီနေ့ညအထိ ကိုဗစ်-၁၉ လူနာသစ် ၇၂ ဦးရှိပြီဖြစ်ပြီး စစ်တွေက ၆၇ ဦး၊ မြောက်ဦးက ၃ ဦးနဲ့ သံတွဲက ၂ ဦးတို့ ဖြစ်ပါတယ်။
နိုင်ငံတဝန်းလုံးမှာတော့ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၄၆၃ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ ၃၄၁ ဦးအနက် ဆေးရုံက ဆင်းခွင့်ပြုခဲ့ပြီးသူ ၃၃၅ ဦးနဲ့ စောင့်ကြည့်လူနာအသစ် ၂၈ ဦးရှိပါတယ်။
ကမ္ဘာတဝန်းမှာတော့ ဒီနေ့မနက်အထိ ကိုဗစ်-၁၉ အတည်ပြုလူနာ ၂၃ ဒသမ ၅ သန်းကျော်၊ သေဆုံးသူ ၈ သိန်းကျော်နဲ့ ရောဂါပိုးကင်းစင်လာသူ ၁၆ သန်းကျော်ရှိပြီလို့ သိရပါတယ်။
