သတင်းတု၊ သတင်းမှားတွေကို ဖြန့်ဖြူးဖို့အတွက် နောက်ကွယ်ကနေ ငွေပုံပေးပြီး စေခိုင်းသူတွေကို ဖော်ထုတ်ရရှိပါက ဥပဒေတွေနဲ့အညီ ထိရောက်စွာအရေးယူသွားမယ်လို့ သမ္မတရုံးပြောရေးဆိုခွင့်ရှိသူ  ဦးဇော်ဌေးက ပြောပါတယ်။

အစိုးရရဲ့ ၄ နှစ်ပြည့် သတင်းစာရှင်းလင်းပွဲတုန်းက ဦးဇော်ဌေးအနေနဲ့ သတင်းတု၊သတင်းမှားတွေကို အဖွဲ့အစည်းလိုက် လုပ်ဆောင်မှုတွေရှိနေပြီး အထူးသဖြင့် နေပြည်တော် အသိုင်းအဝိုင်းထဲမှာ ရှိနေတယ်လို့ ပြောကြားခဲ့တာပါ။

ရွေးကောက်ပွဲ နီးကပ်လာချိန်မှာ ရည်ရွယ်ချက်ရှိရှိနဲ့ မမှန်မကန်တဲ့ သတင်းတွေကို ဖြန့်ဖြူးဖို့အတွက် လုပ်နေတာတွေ့ရပြီး နောက်ကွယ်က စေခိုင်းသူတွေကို စုံစမ်းနေတယ်လို့ ဆိုပါတယ်။

ဦးဇော်ဌေးက “ နောက်ကွယ်က ငွေပုံပေးပြီးတော့ ခိုင်းစေတဲ့သူ၊မည်သူမဆို၊ ကျနော်တို့ ဥပဒေနဲ့အညီ နိုင်ငံရေးပါတီများမှတ်ပုံတင်ရေးဆိုင်ရာဥပဒေ၊ ရွေးကောက်ပွဲဆိုင်ရာ ဥပဒေ စသဖြင့် သက်ဆိုင်ရာဥပဒေတွေ ရှိပါတယ်။ အဲ့တာတွေနဲ့ ငြိစွန်းသွားနိုင်ပါတယ်။ အရေးယူတာတွေခံရနိုင်တယ်ဆိုတာ ကျနော်တို့ သတိပေးတာဖြစ်တယ် ” လို့ ဇူလိုင် ၁၇ ရက်က ပြုလုပ်တဲ့ သမ္မတအိမ်တော် သတင်းစာရှင်းလင်းပွဲမှာ ပြောပါတယ်။

ကိုဗစ်ကာလဖြစ်တဲ့အတွက် သတင်းမီဒီယာသမားတွေလည်း ရပ်တည်ဖို့ခက်ခဲနေချိန်ကို အခွင့်ကောင်းယူပြီး နိုင်ငံရေးပါတီတွေ၊ အဖွဲ့အစည်းတွေက ငွေပုံပေးပြီး စည်းရုံးကာ သတင်းအမှားတွေ ဖြစ်ပေါ်လာစေဖို့ ဖန်တီးလုပ်ဆောင်နေတာဖြစ်တယ်လို့ ဆိုပါတယ်။

ဦးဇော်ဌေးက “ ဒီကာလမှာ တကယ့်ကို အားလုံးခက်ခဲနေသလို မီဒီယာတွေမှာလည်း အခက်အခဲတွေကြုံတယ်။ တချို့ဆိုရင် လူတွေ လျော့တာ၊ လစာတွေလျှော့တာရှိတယ်။ ဒီအပိုင်းမှာလည်း တကယ့်ကို မီဒီယာကို ယုံယုံကြည်ကြည်နဲ့ ခံယူချက်ကောင်းကောင်းနဲ့ လုပ်နေတဲ့လူတွေက တပိုင်း၊ ဒီအပေါ်ကို အသုံးချပြီး အဖွဲ့စည်းတွေ၊ပါတီတွေက စည်းရုံးပြီးတော့ ကမ်ပိန်းတွေပေါ့၊ သတင်းတု၊သတင်းမှားကမ်ပိန်းတွေ လုပ်လာတာကတပိုင်း။ ဒါကိုတော့ ခွဲခွဲခြားခြားမြင်ဖို့ လိုတယ် ” လို့လည်း ဦးဇော်ဌေးက ပြောပါတယ်။

သတင်းမီဒီယာတိုက်တွေနဲ့ ကျင့်ဝတ်နဲ့အညီဆောင်ရွက်နေတဲ့ သတင်းသမားတွေကို ဆိုလိုခြင်းမဟုတ်ပေမယ့် နိုင်ငံရေးပါတီတွေ၊ အဖွဲ့အစည်းတွေထံက ငွေကြေးရယူကာ တရားဝင်သတင်းမီဒီယာထူထောင်ပြီး ဘက်မမျှတဲ့ သတင်းဖော်ပြချက်မျိုးတွေကို ဆိုလိုခြင်း ဖြစ်တယ်လို့လည်း ဦးဇော်ဌေးက ပြောပါတယ်။

သတင်း-ဖြိုးသက်ပိုင်မြင့် (နေပြည်တော်)