ကချင်ပြည်နယ်အတွင်း ၂၀၂၀ နိုဝင်ဘာ ၈ ရက်နေ့ ရွေးကောက်ပွဲအချိန်မှာ ၁၈ နှစ်ပြည့်ပြီး ပထမဦးဆုံးအကြိမ်  မဲစတင်ပေးရမယ့် လူငယ်မဲဆန္ဒရှင်ပေါင်း ၁ သိန်းကျော်ရှိပြီး မိုးညှင်းခရိုင်မှာ အများဆုံးဖြစ်တယ်လို့ ရွေးကောက်ပွဲကော်မရှင်အဖွဲ့ခွဲကနေ သိရပါတယ်။ 

မိုးညှင်ခရိုင် ရွေးကောက်ပွဲကော်မရှင်အရာရှိက ဇူလိုင် ၁၃ ရက် မိုးညှင်းခရိုင် ရွေးကောက်ပွဲကော်မရှင်ရုံးခန်းမှာ နိုင်ငံရေးပါတီတွေနဲ့ လုပ်ငန်းညှိနှိုင်းဆွေးနွေးပွဲမှာ မြစ်ကြီးနား၊ ဗန်းမော်၊ ပူတာအို၊  မိုးညှင်းခရိုင် ၄ ခရိုင်ရှိ မဲဆန္ဒရှင်တွေရဲ့ အခြေအနေနဲ့ ပတ်သက်ပြီး  ပြောကြားခဲ့တာ ဖြစ်ပါတယ်။

မိုးညှင်းခရိုင် ရွေးကောက်ပွဲကော်မရှင် အရာရှိ ဦးမျိုးမင်းဦးက “၂၀၂၀မှာ အသစ်စက်စက် စတင်မဲပေးရမယ့်လူငယ်တွေ မိုးညှင်းခရိုင်မှာ ငါးသောင်းကျော်၊ ဗန်းမော်ခရိုင်မှာ သုံးသောင်းကျော်၊ မြစ်ကြီးနားခရိုင်မှာ နှစ်သောင်းကျော်၊ ပူတာအိုခရိုင်မှာ ငါးထောင်ကျော် ရှိတဲ့အတွက် မိုးညှင်းခရိုင်ကအများဆုံးပါပဲ”လို့ ပြောပါတယ်။

မိုးညှင်းခရိုင်အတွင်း မိုးညှင်းနဲ့ ဖားကန့်မြို့နယ် ၂ ခုပေါင်း မဲဆန္ဒရှင် အရေအတွက် စုစုပေါင်း ၃ သိန်းလောက်နဲ့  မိုးကောင်းမြို့နယ်မှာ  ၁ သိန်းလောက် ရှိနိုင်မယ်လို့ ကော်မရှင်က ပြောပါတယ်။

၂၀၂၀ ရွေးကောက်ပွဲမှာ ဝင်ပြိုင်ဖို့အတွက် ကိုယ်စားလှယ်လောင်းတင်သွင်းခဲ့တဲ့ ပါတီတွေကတော့ မိုးညှင်းမှာ  ၁၀ ပါတီ၊ ဖားကန့်မှာ  ၉ ပါတီနဲ့ မိုးကောင်းမှာ  ၁၁ ပါတီ ရှိပါတယ်။

သတင်း-မုန်းမုန်းမင်း