စစ်ကိုင်းတိုင်း ရေဦးမြို့မှာ ပေါ်တာဆွဲဖမ်းဆီးခံထားရသူ လူငယ် ၇ ယောက်ဟာ ဇွန် ၁၄ ရက်က အစောင့်တွေကို ထိုးကြိတ်ပြီး ထွက်ပြေးလွတ်မြောက်လာကြတယ်လို့ ရေဦးမြို့နယ် ပြည်သူ့ကာကွယ်ရေးအဖွဲ့ (ပကဖ) က ပြောပါတယ်။

ရေဦးမြို့နယ် ပကဖ ရဲ့ ပြန်ကြားရေးတာဝန်ခံကေ “ရေဦးမြို့ပေါ်မှာ ပေါ်တာဆွဲခံရပြီးတော့ မြို့ပေါ်က အထက ၂ မှာ ထိန်းသိမ်းခံထားရတဲ့ လူငယ် ၇ ယောက် ထွက်ပြေးလွတ်မြောက်လာတာပါ။ သူတို့ ၇ ယောက်လုံးက အသက် ၂၀ နဲ့ ၃၀ ကြားတွေဖြစ်ကြပြီးတော့ ရေဦး​မြို့ပေါ်နဲ့ ရေဦးမြို့နယ်ထဲက ရွာတွေကပါ” လို့ ပြောပါတယ်။

အဆိုပါ ၇ ယောက်ဟာ ပြီးခဲ့တဲ့ မေလကုန်ပိုင်းနဲ့ ဇွန်လဆန်းပိုင်းတွေမှာ ပေါ်တာဆွဲခံခဲ့ရပြီး ရေဦးမြို့ပေါ်က အထက ၂ ကျောင်းမှာ ထိန်းသိမ်းခံထားရတာလို့ ဆိုပါတယ်။

ရေဦးမြို့နယ် ပကဖ တာဝန်ရှိသူတယောက်က “ထွက်ပြေးလာတဲ့သူတွေဟာ ပြည်သူတွေကတဆင့် ကျေးရွာပကဖ ကို ချိတ်ဆက်ပြီး မြို့နယ်ပကဖ ဆီကို ရောက်လာခဲ့ကြတာပါ။ သူတို့ ၇ ယောက်လုံး လူငယ်တွေဖြစ်ပြီးတော့ သူတို့ကို ထိန်းသိမ်းထားတဲ့ စာသင်ကျောင်းမှာ အစောင့်တွေက ၆၀ ကျော် အဘိုးကြီး ၃ ယောက်တဲ့။ အဲ့ဒီ အဘိုးကြီး ၃ ယောက်ကို ထိုးကြိတ်ပြီးထွက်ပြေးလာကြတာ။ သူတို့ထဲက တယောက်က မြို့ပေါ်ကို မှတ်ပုံတင်လာလုပ်ရင်း အဆွဲခံရတာ။ နောက်တယောက်က စစ်ကိုင်းဘက် ရတနာပုံတံတားနားမှာ ကားပေါ်ကနေ ဆွဲအချခံရတာ။ သူတို့ ၂ ယောက်ကတော့ သူတို့ရွာတွေကို ပြန်ဖို့ဆန္ဒရှိလို့ စီစဥ်ပေးရမှာပါ။ ကျန်တဲ့ ၅ ယောက်က ရေဦးမြို့ပေါ်ကဖြစ်ပြီးတော့ အိမ်တွေထဲကို ဝင်ဆွဲခံရသူတွေပါ။ သူတို့က မြို့ပေါ်မှာနေကြတာဆိုတော့ မပြန်ရဲကြလို့ သူတို့တွေရဲ့ မိသားစုတွေခေါ်ပြီး ကျနော်တို့ စိုးမိုးနယ်မြေထဲက ရွာတရွာမှာ နေထိုင်စားသောက်ရေးနဲ့ အလုပ်အကိုင်တွေ စီစဥ်ပေးရမှာပါ” လို့ DVB ကို ပြောပါတယ်။

ရေဦးမြို့ပေါ်မှာ စစ်တပ်က နေအိမ်တွေထဲအထိ ဝင်ရောက်ပြီး အဓမ္မပေါ်ဆွဲဖမ်းဆီးနေတာကြောင့် လူငယ်အများစုဟာ ​ဘေးလွတ်ရာနေရာတွေကို ပြောင်းရွှေ့နေကြရတယ်လို့ ဆိုပါတယ်။

နိုင်ငံတဝန်းမှာ စစ်ရှုံးနေတဲ့ စစ်တပ်ဟာ စစ်အင်အားဖြည့်တင်းဖို့ ပြည်သူတွေကို မတရားပေါ်တာဆွဲ ဖမ်းဆီးပြီး စစ်သင်တန်းပေးနေတာဟာ အပတ်စဥ် ၂၅ အထိ ရောက်ရှိနေပါပြီ။