ရခိုင်ပြည်နယ်၊ ဝီရဌာနေ(​ပေါက်​တော)မြို့နယ်၊ ယင်ရဲကန်ကျေးရွာမှာ အသက်မပြည့်​သေးတဲ့ မိန်းက​လေး တယောက်ကို အဓမ္မပြုကျင့်ခဲ့တဲ့ အမျိုးသား ထွက်​ပြေးတိမ်း​ရှောင်သွားပြီး ဖမ်းမမိ ​သေးဘူးလို့ ​ဒေသခံ​တွေဆီက သိရပါတယ်။

အသက် ၁၅ နှစ်အရွယ် မိန်းကလေးတယောက်ကို အဓမ္မပြုကျင့်ခဲ့တဲ့ အသက် ၅၅ နှစ်အရွယ် မောင်ကျော်သိန်းကို တိုင်ကြားထား​ပြီး အာရက္ခတပ်​တော် (AA) ရဲတပ်ဖွဲ့က လာရောက်ဖမ်းဆီးချိန် ထွက်ပြေးတိမ်းရှောင်သွားတယ်လို့ သိရပါတယ်။

​ဒေသခံတ​ယောက်က “အခုထိ ဖမ်းမမိ​သေးဘူး။ ​က​လေးမ​က ကိုယ်ဝန် ၈ လ ရှိ​နေပြီ” လို့ DVB ကို ​ပြောပါတယ်။

မတ် ၂၉ ရက် ည ၉ နာရီခွဲခန့်က ဖြစ်ပွားခဲ့တာဖြစ်ပြီး မိန်းကလေးဟာ သူငယ်ချင်း​တွေနဲ့ မုန့်လုပ်စား ပြီးနောက် အပြန်လမ်းမှာ မောင်ကျော်သိန်းဆိုသူရဲ့ အဓမ္မပြုကျင့်မှုကို ခံခဲ့ရတာလို့ ဆိုပါတယ်။

အဲဒီဖြစ်စဉ်ကို မိန်းကလေးရဲ့ မိဘ​တွေက ဇွန် ၁၄ ရက် မနက် ၈ နာရီမှ သိရှိခဲ့ပြီး ဇွန် ၁၈ ရက်မှာ ကျေးရွာအုပ်ချုပ်ရေးမှူးဆီ တိုင်ကြားခဲ့တာလို့ သိရပါတယ်။

အဲဒီ​နောက် ဇွန် ၁၉ ရက်မှာ သပြေကန်ရဲစခန်းကို သွားရောက်တိုင်ကြားခဲ့ရာ ရဲတပ်ဖွဲ့က တရားခံလို့ တိုင်ကြားခံထားရသူ မောင်ကျော်သိန်းကို သွားရောက်ဖမ်းဆီး​ပေမဲ့ ထွက်ပြေး တိမ်းရှောင် သွား ခဲ့တယ်လို့ သိရပါတယ်။

လက်ရှိမှာ မောင်ကျော်သိန်းရဲ့ ဖမ်းဆီးရမိမှု အခြေအနေနဲ့ အမှုဆက်လက်ဆောင်ရွက်နေမှုတို့ကို သီးခြားအတည်ပြုနိုင်တာ မရှိသေးပါဘူး။