မကွေးတိုင်းဒေသကြီးမှာ ပြီးခဲ့တဲ့ ဧပြီလနဲ့မေလအတွင်း လေပြင်းတိုက်ခတ်မှု ၁၁၈ ကြိမ် ဖြစ်ပွားခဲ့ပြီး လူဦးရေ ၁၀၀၀၀ ကျော် လေဘေးသင့်ခဲ့ကာ သေဆုံးသူ ၃ ဦးနဲ့ ဒဏ်ရာရသူ ၄ ဦး ရှိခဲ့တယ်လို့ တိုင်း ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနကနေ သိရပါတယ်။
ဒါ့အပြင် နေအိမ် ၁၁၅ လုံးပြိုကျပျက်စီးပြီး အိမ်ခြေ ၂၇၀၀ လောက် တစ်စိတ်တစ်ပိုင်းပျက်စီးကာ ဘာသာရေး အဆောက်အုံ တစ်လုံးပြိုကျခဲ့သလို ၅၈ လုံးတစ်စိတ်တစ်ပိုင်းပျက်စီးခဲ့တယ်လို့ မကွေးတိုင်း ဘေးအန္တရာယ်ဆိုင်ရာစီမံခန့်ခွဲမှု ဦးစီးဌာန ညွှန်ကြားရေးမှူး ဦးမြင့်စိုးက ပြောပါတယ်။
လေဘေးသင့်ပြည်သူတွေကို ဆန်ရိက္ခာဖိုးနဲ့ အိမ်ဆောက်ပစ္စည်းဖိုး ကျပ်သိန်းပေါင်း ၁၂၀၀ ကျော်ထောက်ပံ့ပေးခဲ့ကာ ကယ်ဆယ်ရေးပစ္စည်း ၁၇ မျိုးထောက်ပံ့ပေးခဲ့တယ်လို့လည်း ပြောပါတယ်။
မကွေးတိုင်းဒေသကြီးမှာ ယခုနှစ်အတွင်းလေပြင်းတိုက်ခတ်မှုအကြိမ်ရေနဲ့ ပျက်စီးဆုံးရှုံး မှုအနေနဲ့ ပြီးခဲ့တဲ့ ၂၀၁၉ ခုနှစ်ကထက် ပိုမိုများပြားတယ်လို့ ဘေးအန္တယ်ရာယ်စီမံခန့်ခွဲမှု ဦးစီးဌာနကနေ သိရပါတယ်။
သတင်း-မင်းထီး
